3 րոպեի ընթերցում
Հայաստանի կրթության, գիտության, մշակույթի և սպորտի նախարարությունը հայտարարում է արվեստի ոլորտում 2026 թվականին նախատեսված դրամաշնորհային ծրագրերի մրցույթները:
«Արմենպրես»-ի փոխանցմամբ՝ ՀՀ ԿԳՄՍ նախարարությունն այդ մասին հաղորդագրություն է տարածել։
Դրանք կիրականացվեն հետևյալ չորս անվանակարգերում.
«Արվեստի ոլորտի ստեղծագործական ծրագրեր և նախագծեր»
Անվանակարգում իրականացվող դրամաշնորհային մրցույթի նպատակն է խթանել Հայաստանում իրականացվող ժամանակակից արվեստի ստեղծագործական նախաձեռնությունների իրականացմանը, նպաստել արվեստի մատչելիությանը տարբեր սոցիալական խմբերի համար՝ խթանելով ժամանակակից արվեստի տարածումը և հանրահռչակումը:
Մրցույթի հայտերն անհրաժեշտ է ներկայացնել մինչև 2025թ. սեպտեմբերի 26-ը՝ ժամը 18:00-ն։
«Կինոարվեստի նախագծեր»
Անվանակարգում իրականացվող դրամաշնորհային մրցույթի հիմնական նպատակն է խթանել կինոարվեստի ոլորտի միջոցառումների իրականացումը, աջակցել Հայաստանում իրականացվող միջազգային կինոփառատոնների կայուն գործունեությանը, նպաստել միջազգային համագործակցության և մասնագիտական փորձի փոխանակման հնարավորությունների ընդլայնմանը, ակտիվացնել մասնագիտական հանրույթի ներգրավվածությունը, աջակցել Հայաստանում և արտերկրում հայկական կինոարվեստի հանրահռչակմանը, նպաստել մշտական հանդիսատեսի (լսարանի) ձևավորմանը և ստեղծարար, տաղանդավոր անհատ արվեստագետների առաջխաղացմանը։ Մրցույթի հայտերն անհրաժեշտ է ներկայացնել մինչև 2025 թ. սեպտեմբերի 26-ը՝ ժամը 11:00-ն։
«Մշակութային միջոցառումների իրականացում ՀՀ մարզերում»
Անվանակարգում իրականացվող դրամաշնորհային մրցույթի նպատակներն են մշակութային կյանքի ապակենտրոնացումը, մարզային մշակութային գործունեության խթանումը և կարողությունների զարգացումը, համայնքային մշակույթի և ժամանցի կազմակերպումը, միջհամայնքային և միջմարզային համագործակցության ամրապնդումը, մշակութային ծառայությունների որակի բարձրացումը:
Մրցույթի հայտերն անհրաժեշտ է ներկայացնել մինչև 2025 թ. սեպտեմբերի 26-ը՝ ժամը 15:00-ն։
«Ստեղծագործական մանկապատանեկան կրթամշակութային նախագծեր»
Անվանակարգում իրականացվող դրամաշնորհային մրցույթի հիմնական նպատակն է աջակցել մանկապատանեկան սերնդի ստեղծագործական և գեղագիտական դաստիարակությանը՝ զարգացնելով կրթամշակութային միջավայրը և ապահովելով գեղարվեստական կրթության հասանելիությունն ու որակը:
Մրցույթի հայտերն անհրաժեշտ է ներկայացնել մինչև 2025թ. սեպտեմբերի 26-ը՝ ժամը 13:00-ը:
Հայտեր կարող են ներկայացնել www.armeps.am էլեկտրոնային համակարգում գրանցված, իրավաբանական անձի կարգավիճակ ունեցող կազմակերպությունները: