2 րոպեի ընթերցում
Շվեյցարիան պատրաստ է դառնալ բանակցային հարթակ Ռուսաստանի և Ուկրաինայի նախագահներ Վլադիմիր Պուտինի և Վոլոդիմիր Զելենսկու համար, հայտարարել է երկրի արտաքին գործերի նախարար Ինյացիո Կասիսը։ «Արմենպրես»-ի փոխանցմամբ՝ այս մասին հաղորդում է AFP գործակալությունը։
Նախարարը նշել է, որ Շվեյցարիան պատրաստ է հանդիպումը կազմակերպել սեղմ ժամկետում, և այդ դեպքում Պուտինին կտրամադրի քրեական հետապնդումից անձեռնմխելիություն։
Կասիսի խոսքով՝ Շվեյցարիայի կառավարությունը սահմանել է կանոններ` «անձեռնմխելիություն տրամադրելու այն անձին, որի ձերբակալման հրաման է տրվել»։ Պաշտոնյան նշել է, որ անձեռնմխելիությունը կտրամադրվի, «եթե տվյալ անձը գա խաղաղության համաժողովի, այլ ոչ թե անձնական գործերով»:
Ավելի վաղ Ֆրանսիայի նախագահ Էմանուել Մակրոնն առաջարկել էր Պուտինի և Զելենսկու միջև հանդիպում անցկացնել Ժնևում:
Շվեյցարիան ճանաչում է Միջազգային քրեական դատարանի իրավասությունը։ 2023 թվականին ՄՔԴ-ն Վլադիմիր Պուտինի և ՌԴ երեխաների իրավունքների հանձնակատար Մարիա Լվովա-Բելովայի ձերբակալման հրաման է տվել՝ նրանց մեղադրելով «Ուկրաինայի օկուպացված տարածքներից երեխաներին Ռուսաստանի Դաշնություն անօրինական կերպով արտաքսելու մեջ»։
Մոսկվան դատարանի որոշումները համարում է իրավաբանորեն անվավեր:
Ռուսաստանի և Ուկրաինայի միջև գագաթնաժողովի նախապատրաստման մասին հայտարարել է ԱՄՆ նախագահ Դոնալդ Թրամփը, որն օգոստոսի 18-ին Սպիտակ տանն ընդունել է Ուկրաինայի նախագահ Վոլոդիմիր Զելենսկուն և եվրոպացի առաջնորդներին, ինչպես նաև հեռախոսազրույց է ունեցել Վլադիմիր Պուտինի հետ։ Գերմանիայի կանցլեր Ֆրիդրիխ Մերցը չի բացառել, որ հանդիպումը կարող է տեղի ունենալ երկու շաբաթից։