2 րոպեի ընթերցում
Գեղարքունիքի մարզի Մարտունի քաղաքում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում ավարտական փուլում են գտնվում Արցախի, Պարույր Սևակ և Թումանյան փողոցների հիմնանորոգման աշխատանքները։
Ինչպես «Արմենպրես»-ին տեղեկացրին Մարտունու համայնքապետարանի աշխատակազմից, հիմանորոգումն ընդգրկում է վերոնշյալ փողոցների մայթերի սալիկապատման, ճանապարհների երթևեկելի մասերի ասֆալտապատման ու ջրահեռացման համակարգերի կառուցման աշխատանքները։
Մարտունու Արցախի, Պարույր Սևակ և Թումանյան փողոցների երթևեկելի մասերի ասֆալտապատման ծրագրի պայմանագրային արժեքը կազմում է 79 միլիոն 963 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Մարտունու համայնքապետարանը։ Ծրագրով նախատեսված է 3 փողոցների ճանապարհների երթևեկելի մասերի ասֆալտապատում՝ 1311 գծամետր ընդհանուր երկարությամբ և 9177 քմ մակերեսով։
Շինարարական աշխատանքները, որոնք իրականացրել է «Շանթ-Սեյրան» ՍՊԸ-ն, սկսվել են 2024 թվականի հոկտեմբերից և արդեն գտնվում են ավարտական փուլում։
2024 թվականի սուբվենիցոն մեկ այլ ծրագրով սալիկապատվել են Արցախի, Պարույր Սևակ և Թումանյան փողոցների մայթերը՝ 1380 գծամետր ընդհանուր երկարությամբ և 2651 քառակուսի մետր մակերսով։ Ծրագրի շրջանակներում կառուցվել է նաև ջրահեռացման համակարգ։
Ծրագրի պայմանագրային արժեքը կազմում է 115 միլիոն 645 հազար դրամ, որի 70 տոկոսը հատկացնում է ՀՀ կառավարությունը, 30 տոկոսը՝ Մարտունու համայնքապետարանը։
Շինարարական աշխատանքները մեկնարկել են 2024 թվականի սեպտեմբերից և արդեն մոտենում են ավարտին։
Շինաշխատանքներն իրականացնում է «ՎՄՎ ՔՈՄՓՆԻ» ՍՊԸ-ն։