Մեկնարկել են Վարդենիս քաղաքի բազմաբնակարան շենքերի բակային տարածքների հիմնանորոգման աշխատանքները

Արդեն մի քանի օր է, ինչ Գեղարքունիքի մարզի  Վարդենիս քաղաքում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում մեկնարկել և ընթանում են Երիտասարդության -11, 3 , 2, 6, 12 և Արզոյան -2  բազմաբնակարան շենքերի  բակային տարածքների հիմնանորոգման աշխատանքները։

Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, Վարդենիսի բազմաբնակարան շենքերի բակային տարածքների հիմնանորոգման ծրագրի պայմանագրային արժեքը կազմում է 85 միլիոն 764 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Վարդենիսի համայնքապետարանը։ 

Ծրագրով նախատեսված է Վարդենիս քաղաքի Երիտասարդության -11, 3 , 2, 6, 12 և Արզոյան -2  բազմաբնակարան շենքերի  բակային տարածքների ասֆալտապատում՝ 8082 քառակուսի մետր մակերեսով։ Շինարարությունը նախատեսվում է ավարտի հասցնել 2025 թվականի հոկտեմբերին։ 

Այս պահին ընթանում են  հողային հարթեցման, ինչպես նաև՝ ապօրինի շինությունների ապամոնտաժման աշխատանքներ` բակային տարածքներն ասֆալտապատմանը նախապատրաստելու նպատակով: 

Շինարարական աշխատանքներն իրականացնում են «Լեյվլ» և «Մոնտաժտրանսշին» ընկերությունները։