Թուրքիայի և Ռուսաստանի նախագահները քննարկել են տարածաշրջանային և գլոբալ հարցերը

Թուրքիայի նախագահ Ռեջեփ Թայիփ Էրդողանը հուլիսի 18-ին հեռախոսազրույց է ունեցել Ռուսաստանի նախագահ Վլադիմիր Պուտինի հետ։ «Արմենպրես»-ի հաղորդմամբ՝ այս մասին տեղեկացնում է Թուրքիայի նախագահի աշխատակազմը։

Զրույցի ընթացքում Էրդողանը կարևորել է Ուկրաինայի և Ռուսաստանի միջև ուղիղ բանակցությունների երրորդ փուլի մեկնարկը և հայտնել Թուրքիայի պատրաստակամությունը՝ կրկին հյուրընկալելու այդ բանակցությունները Ստամբուլում։ 

Հաղորդագրության համաձայն՝ զրուցակիցները քննարկել են ռուս-թուրքական երկկողմ հարաբերությունների ընթացքը, ինչպես նաև տարածաշրջանային և գլոբալ զարգացումները։

«Էրդողանը հայտարարել է, որ կարևոր է սկսել Ռուսաստանի և Ուկրաինայի միջև բանակցությունների երրորդ փուլը և որ Թուրքիան պատրաստ է ընդունել այդ բանակցությունները Ստամբուլում, երբ որոշվեն կողմերի համար հարմար ժամկետները», – ասված է հաղորդագրությունում։

Էրդողանը նաև նշել է, որ Անկարան շահագրգռված է Սիրիայում կայունության պահպանմամբ։