Իսրայելը մարդասիրական օգնություն կտրամադրի Սիրիայի դրուզներին

Իսրայելի արտաքին գործերի նախարար Գիդեոն Սաարը հրահանգել է գրեթե 595 000 դոլարի մարդասիրական օգնություն ուղարկել Սիրիայի հարավային աս-Սուեյդայի նահանգի դրուզներին: «Արմենպրես»-ի փոխանցմամբ՝ այս մասին հայտնում է Իսրայելի արտաքին գործերի նախարարությունը X հարթակում գրառման մեջ:

«Աս-Սուեյդայում դրուզների դեմ վերջերս տեղի ունեցած հարձակումների և այնտեղ ստեղծված լուրջ մարդասիրական իրավիճակի լույսի ներքո, ինչպես նաև առկա կարիքներին համապատասխան՝ արտաքին գործերի նախարար Գիդեոն Սաարը հրամայել է անհապաղ մարդասիրական օգնություն փոխանցել աս-Սուեյդայի դրուզներին», - նշվել է հայտարարության մեջ։

Օգնության փաթեթի ընդհանուր արժեքը կկազմի 2 միլիոն շեկել (594 800 դոլար՝ ներկայիս փոխարժեքով)։ Այն կներառի, մասնավորապես, սննդի փաթեթներ, բժշկական սարքավորումներ, առաջին բուժօգնության պարագաներ և դեղորայք։ Ֆինանսավորումը տրամադրվում է Իսրայելի արտաքին գործերի նախարարության բյուջեից։

«Օգնությունը կտրամադրվի Արտաքին գործերի նախարարության բյուջեից և նպատակային կերպով կուղղվի աս-Սուեյդայի շրջանի դրուզական բնակավայրերին, որոնք անմիջականորեն տուժել են դրուզների դեմ բռնի հարձակումներից։

Այս օգնությունը միանում է նախորդ օգնության փաթեթին, որն Արտաքին գործերի նախարարությունը փոխանցել էր Սիրիայում գտնվող դրուզներին նախորդ մարտին»,- նշվել է հայտարարության մեջ։

Սիրիայի հարավում իրավիճակը սրվել է հուլիսի 13-ին, երբ աս-Սուեյդայի նահանգում բախումներ սկսվեցին բեդվինների և դրուզ ուժերի միջև։ Հուլիսի 15-ին սիրիական բանակը մտավ նահանգ՝ իրավիճակը կայունացնելու նպատակով։ Կարճ ժամանակ անց Իսրայելը սկսեց հարվածել Սիրիայի զինված ուժերին՝ շեշտելով նահանգի դրուզ բնակչությանը պաշտպանելու ցանկությունը, իսկ հուլիսի 16-ին հրետակոծեց Սիրիայի մայրաքաղաքի մի քանի ռազմավարական օբյեկտներ։

Միջազգային միջամտության արդյունքում նահանգում հրադադար հաստատվեց, սակայն սիրիական աղբյուրները հայտնում են ցեղախմբերի, ինչպես  նաև Իսրայելի կողմից այն խախտելու մասին։