Հայ մասնակիցը մանկական «Սլավյանսկի բազարում» արժանացել է ԱՊՀ երկրների բարեկամության հատուկ մրցանակի

Բելառուսի Հանրապետության Վիտեբսկ քաղաքում հուլիսի 7-15-ը տեղի է ունենում «Սլավյանսկի բազար 2025» ամենամյա հեղինակավոր միջազգային մանկական և երիտասարդ կատարողների երաժշտական մրցույթը:

«Արմենպրես»-ի հաղորդմամբ՝ Հայաստանը հուլիսի 7-11-ը մանկական կատարողների մրցույթում այս տարի ներկայացրել է 11-ամյա Միլանա Օրդակյանը:

Երկու մրցութային օրերի ընթացքում Միլանան հանդես է եկել Արիանա Գրանդեի «Beauty and the Beast» և Ալեքսանդրա Պախմուտովայի  «Беловежская пуща»  ստեղծագործությունների կատարմամբ։

Հուլիսի 11-ին տեղի է ունեցել մանկական մրցույթի գալա համերգ-մրցանակաբաշխությունը, որի ժամանակ Միլանա Օրդակյանը արժանացել է ԱՊՀ երկրների բարեկամության  «Խրուստալնայա նոտկա» հատուկ մրցանակի:

«Սլավյանսկի բազար» երիտասարդ կատարողների ամենամյա մրցույթում այս տարի Հայաստանը կներկայացնի 27-ամյա Դավիթ Կիրակոսյանը: