Շրջակա միջավայրի նախարարությունն ապատեղեկատվություն է որակել Հայաստան գաղտնի կերպով միջուկային վառելիքի թափոններ տեղափոխելու մասին լուրը

Հայաստանի Հանրապետության շրջակա միջավայրի նախարարությունը անդրադարձել է «Ֆրանսիական Orano ընկերությունը գաղտնի կերպով Հայաստան է տեղափոխում միջուկային վառելիքի թափոններ, որոնք պահվելու են ազգային պարկերից մեկում» վերնագրով համացանցում տարածված հոդվածին՝ ընդգծելով, որ այն ամբողջությամբ ապատեղեկատվություն է և չի համապատասխանում իրականությանը։

«Արմենպրես»-ի հաղորդմամբ՝ նախարարության տարածած հաղորդագրության մեջ, մասնավորապես, ասված է.

«Մամուլում տարածված «Ֆրանսիական Orano ընկերությունը գաղտնի կերպով Հայաստան է տեղափոխում միջուկային վառելիքի թափոններ, որոնք պահվելու են ազգային պարկերից մեկում» վերնագրով հոդվածում ներկայացված տեղեկատվությունն ամբողջությամբ ապատեղեկատվություն է և չի համապատասխանում իրականությանը»։ 

Նախարարությունը կոչ է արել բոլորին՝ զերծ մնալ չստուգված ու անհայտ աղբյուրներից տարածվող տեղեկատվության հանրայնացումից և պատասխանատվությամբ մոտենալ հրապարակվող նյութերի հավաստիությանը։

Այս ապատեղեկատվության տարածմանն անդրադարձել է նաև Հայաստանի Հանրապետության վարչապետ Նիկոլ Փաշինյանը։

«Հիբրիդային պատերազմ, բան՝ ամեն ինչ հասկացանք։ Բայց եթե որևէ մեկը լրջորեն պետք է հարցնի, թե ճի՞շտ է, որ «Դիլիջան» ազգային պարկում ուրանի թափոններ ենք պահում, այդ հարցնողը կամ ավանակ է, կամ գործակալ, կամ էլ այդ ֆեյք լրատվամիջոցը ստեղծած ռոբասերժիկի ընտանիքի անդամ»,-գրել է վարչապետը։

Նշենք, որ ավելի վաղ մի շարք հայկական լրատվամիջոցներ տեղեկատվություն էին տարածել, թե իբր ֆրանսիական Courrier France 24 պարբերականի հոդվածի համաձայն՝ «ֆրանսիական պետական միջուկային Orano ընկերությունը գաղտնի կերպով սկսել է օգտագործված միջուկային վառելիք տեղափոխել Հայաստան»:

Հավելենք, որ կեղծ հոդվածի թարգմանությունը ներկայացրած «Մեդիամաքս» լրատվականն, ավելի ուշ, ընթերցողներից և հանրությունից ներողություն է խնդրել ապատեղեկատվություն պարունակող հոդվածի հրապարակման համար՝ հեռացնելով այն իր կայքից։