2 րոպեի ընթերցում
Իրանը մտադիր չէ հրաժարվել խաղաղ նպատակներով ուրանի հարստացումից՝ շարունակելով հետևել Միջուկային զենքի չտարածման պայմանագրով ստանձնած իր պարտավորություններին, մյուս պետություններն իրավունք չունեն սահմանափակել Թեհրանին այդ հարցում: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է Իրանի արտաքին գործերի փոխնախարար Մաջիդ Թախտ Ռավանչին:
«Մենք Միջուկային զենքի չտարածման պայմանագրի բարեխիղճ մասնակից ենք, դրա հիման վրա մենք իրականացնում ենք ուրանի հարստացում խաղաղ նպատակներով՝ ի բարօրության մեր երկրի: Ոչ ոք չի կարող մեզ ասել, թե ինչ պետք է անենք, քանի դեռ մենք հետևում ենք պայմանագրի շրջանակներում մեր պարտավորություններին», - ասել է Թախտ Ռավանչին Գերմանիայի ARD հեռուստաալիքի եթերում:
Նա նաև նշել է, որ մտադիր չէ մեկնաբանել Իրանի միջուկային ծրագրի վիճակը հունիսի լույս 22-ի գիշերն ԱՄՆ ռազմաօդային ուժերի հարվածներից հետո: Ընդ որում, ընդգծել է փոխնախարարը, ռմբակոծությունն իրենից ներկայացնում է «ագրեսիայի ակնհայտ ակտ»: Թախտ Ռավանչիի խոսքով՝ Իրանն այս իրավիճակում «ագրեսիայի զոհ» է և իրավունք ունի պատասխանելու դրան ՄԱԿ-ի Կանոնադրության 51-րդ հոդվածին համապատասխան։ Միևնույն ժամանակ դիվանագետը չի մեկնաբանել Իրանի կողմից Մերձավոր Արևելքում ամերիկյան ռազմակայաններին հարվածելու հնարավորությունը։
Արտաքին գործերի փոխնախարարը նաև քննադատել է Գերմանիայի կանցլեր Ֆրիդրիխ Մերցին, որը հավանություն է տվել Իրանի դեմ գործողությանը և հայտարարել է, որ հրեական պետությունն իր գործողություններով «կեղտոտ աշխատանք» է կատարում բոլոր արևմտյան երկրների փոխարեն: