Իրանի ԱԳՆ-ն կոչ է արել ՄԱԿ ԱԽ արտակարգ նիստ հրավիրել և դատապարտել ԱՄՆ-ի գործողությունները
2 րոպեի ընթերցում
Իրանի Իսլամական Հանրապետության արտաքին գործերի նախարարությունը հայտարարություն է տարածել երկրի խաղաղ միջուկային օբյեկտներին Ամերիկայի Միացյալ Նահանգների կողմից հասցված հարվածների վերաբերյալ:
«Արմենպրես»-ի հաղորդմամբ՝ Իրանի արտաքին գործերի նախարարության X-ի միկրոբլոգում տարածված հայտարարության մեջ գերատեսչությունը դաժան ռազմական ագրեսիա է որակել և դատապարտել Ամերիկայի Միացյալ Նահանգների հարվածներն Իրանի խաղաղ միջուկային օբյեկտներին:
«Իրանի Իսլամական Հանրապետության արտաքին գործերի նախարարությունը ամենավճռական կերպով դատապարտում է Միացյալ Նահանգների դաժան ռազմական ագրեսիան Իրանի խաղաղ միջուկային օբյեկտների դեմ, ինչը ՄԱԿ-ի կանոնադրության և միջազգային իրավունքի հիմնարար սկզբունքների աննախադեպ ու լուրջ խախտում է»,-մասնավորապես, նշված է հայտարարության մեջ:
Արտգործնախարարությունը պատերազմ հրահրող է համարել ԱՄՆ-ի գործողությունները՝ հայտարարելով, որ դրանց վտանգավոր ու հեռուն գնացող հետևանքների ողջ պատասխանատվությունը կրում է այդ երկիրը:
Իրանի ԱԳՆ-ն միաժամանակ կոչ է արել ՄԱԿ-ի Անվտանգության խորհրդին արտակարգ նիստ հրավիրել ՝ անվերապահորեն դատապարտելու Իրանի դեմ Միացյալ Նահանգների գործողությունը և նրան պատասխանատվության ենթարկելու կազմակերպության կանոնադրության հիմնարար սկզբունքների և միջազգային իրավունքի նորմերի խախտման համար: