2 րոպեի ընթերցում
Կոմպոզիտոր Շուշան Սարգսյանը մասնակցել է Կաննի 78-րդ միջազգային կինոփառատոնին՝ ներկայացնելով ոչ միայն իր արվեստը, այլև հայկական մշակույթի նրբությունն ու ինքնատիպությունը։
«Արմենպրես»-ի հաղորդմամբ՝ Կաննում ներկայացվել է նաև կոմպոզիտորի երաժշտությամբ ֆիլմը:
Շուշան Սարգսյանը մասնակցել է Marche du Film-ի շրջանակում կազմակերպված մասնագիտական հանդիպումներին, ներկայացրել իր երաժշտական ստեղծագործությունները մի շարք միջազգային կինոընկերությունների ներկայացուցիչների՝ պրոդյուսերների և ռեժիսորների՝ ձեռք բերելով համագործակցության խոստումնալից պայմանավորվածություններ։ Այս հաջող քայլերը խոստանում են կրկին բարձրացնել հայի ու Հայաստանի անունը միջազգային հարթակներում։
Կոմպոզիտորը ներկա է եղել նաև ռեժիսոր Արտյոմ Բաղդասարյանի նախաձեռնած «Հայկական տան» միջոցառումներին։ Կարմիր գորգով Շուշան Սարգսյան անցել է հատուկ իր համար կարված «Կոմիտասյան մանուշակներ» անվանումը կրող զգեստով։ Զգեստի հեղինակն է դիզայներ Լուսինե Մովսիսյանը (Լուսնէ արտ), որը ոգեշնչվել է Կոմիտասի ջրամանների նախշազարդերից։ Զգեստը փոխանցում է հայկական մշակույթի խորությունն ու նրբագեղությունը։ Զգեստի հեղինակն ու նախշազարդողը Լուսինե Մովսիսյանն է, կարող դիզայներ՝ Նինա Սարկիսյանց, ոճաբան՝ Արմինե Գևորգյան։