2 րոպեի ընթերցում
Գեղարքունիքի մարզային գրադարանում, Գանձակի թիվ 1 միջնակարգ դպրոցի ուսուցչուհիներ Հասմիկ Ստեփանյանի և Մարինե Հովհաննիսյանի նախաձեռնությամբ, տեղի է ունեցել «Պոեզիայի ժամ»՝ նվիրված Հովհաննես Շիրազի ծննդյան 111-րդ տարեդարձին ։
Ինչպես «Արմենպրես»-ին տեղեկացրին Գեղարքունիքի մարզային գրադարանից, միջոցառումը բացել է գրադարանի տնօրեն Մարիամ Համբարձումյանը՝ ողջունելով ներկաներին և կարևորելով կրթական ու մշակութային հաստատությունների միջև համագործակցության դերը։
Մանկական բաժնի վարիչ Ալինա Ավետիսյանը ներկայացրել է ուշագրավ դրվագներ և հուշեր Հովհաննես Շիրազի կյանքի և ստեղծագործական ուղու վերաբերյալ՝ ընդգծելով բանաստեղծի հոգևոր խորությունը և հայրենասիրական ոգին։
Միջոցառման ընթացքում 9-12-րդ դասարանների աշակերտները հանդես են եկել գրական ընթերցումներով՝ ներկայացնելով Շիրազի ստեղծագործություններից հատվածներ։ Նրանք նաև ցուցադրել են տեսաշարեր՝ նվիրված բանաստեղծի կյանքին ու գրական ժառանգությանը, որոնք բացահայտում էին մեծանուն գրողի հոգևոր կերպարը և մշակութային մեծ ավանդը, ինչպես նաև հանդես եկել երաժշտական գեղեցիկ կատարումներով։
Գրադարանում կազմակերպվել էր նաև Հովհաննես Շիրազի գրքերի ցուցադրություն, որտեղ ներկայացված էին նաև նրա հեղինակային մակագրությամբ օրինակներ։