2 րոպեի ընթերցում
«Ռեստարտ Գավառ» ԵՀԿ-ն Գավառի համայնքապետարանի հետ համատեղ Գավառի «Ժակի Բուլվար» այգում կազմակերպել էր Աշխատանքի օրվան նվիրված բացօթյա միջոցառում:
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, միջոցառման ընթացքում կազմակերպվել էր աշխատանքի և կարիերայի տոնավաճառ, ձեռներեցության վերաբերյալ բիզնես քննարկում, տեղական արտադրանքների տաղավարային ցուցադրություն, գեղանկաչություն, լուսանկարների ցուցադրություն, առաջին բուժօգնության վարպետաց դաս, ազգային պարերի վարպետաց դաս:
Միջոցառմանը մասնակցել են Գավառ համայնքի ղեկավար Գուրգեն Մարտիրոսյանը, առաջին տեղակալ Գրիգոր Դաշտոյանը, տեղակալներ Գրիգոր Բոշյանը, Մուրադ Մովսիսյանը, «Ռեստարտ Գավառ» ԵՀԿ նախագահ Նարեկ Արևշատյանը, համայնքի կրթամշակութային հաստատությունների ներկայացուցիչներ, ձեռնարկատերեր, քաղաքացիներ:
Միջոցառման մասնակիցներին գեղարվեստական կատարումներով ողջունել են Գավառ համայնքի մշակութային հաստատությունների անհատ կատարողներն ու խմբերը, իսկ մարզական ցուցադրական ելույթներով հանդես են եկել Գավառի մարզադպրոցի Գանձակի տարածքային ստորաբաժանման մարզիկները:
«Միջոցառումը բազմաբովանդակ էր, նպատակային, որի ընթացքում փառաբանվեցին աշխատավոր մարդիկ, ներկայացվեցին համայնքի գործարարների, աշխատավորների, արտադրողների, արվեստասերների աշխատանքային ձեռքբերումներն ու հաջողությունները։ Տոնական տրամադրությունը պարզապես համակել էր բոլոր մասնակիցներին»,-ներկայացրին Գավառի համայնքապետարանի աշխատակազմից։