Երդվյալ ատենակալների ինստիտուտը կարող է արդյունավետ լինել առանձնապես ծանր հանցագործությունների գործերով․ Սրբուհի Գալյան
1 րոպեի ընթերցում
Արդարադատության նախարար Սրբուհի Գալյանը խոսեց Հայաստանում երդվյալ ատենակալների ինստիտուտի հնարավոր ներդրման հնարավորության մասին՝ անդրադառնալով վարչապետ Նիկոլ Փաշինյանի հայտարարությանը։ «Արմենպրես»-ի փոխանցմամբ՝ լրագրողների հետ ճեպազրույցում նախարարը նշեց, որ անհրաժեշտ է նախ բացահայտել ինստիտուտի հնարավոր դրական և բացասական կողմերը։ Ըստ Գալյանի՝ միայն այդ վերլուծությունից հետո հնարավոր կլինի որոշում կայացնել՝ արդյոք Հայաստանը պետք է ներդնի երդվյալ ատենակալների համակարգ, թե ոչ։
«Առաջին հայացքից կարող եմ ասել, որ երդվյալ ատենակալների ինստիտուտը որոշակի կոնկրետ դեպքերում կարող է օգտակար լինել։ Այսինքն՝ անհրաժեշտ է այդ ինստիտուտը ինտեգրել ոչ թե բոլոր գործերի պարագայում, այլ միայն որոշակի դեպքերում, օրինակ՝ առանձնապես ծանր հանցագործությունների քննության ժամանակ։ Կարծում եմ՝ այս տարբերակը կարող է լինել արդյունավետ՝ որպես պրոֆեսիոնալ դատավորին օժանդակող լրացուցիչ միջոց»,- ասաց Գալյանը։
Նախարարը ընդգծեց, որ քննարկումները կանցկացվեն նաև նոր Սահմանադրության տեքստի մշակման շրջանակներում, հաշվի առնելով նոր Սահմանադրությամբ սահմանվող դատական իշխանության ձևավորման և Բարձրագույն դատական խորհրդի կազմակերպման սկզբունքները։