Ալժիրի կողմից ֆրանսիացի պաշտոնյաների արտաքսումը «հետևանքներ կունենա». Ֆրանսիայի ԱԳ նախարար

Ֆրանսիայի արտաքին գործերի նախարար Ժան-Նոել Բարոն քննադատել է ֆրանսիացի 12 դիվանագետի արտաքսելու Ալժիրի որոշումը և նախազգուշացրել է դրա հետևանքների մասին։ «Արմենպրես»-ի փոխանցմամբ՝ այս մասին հաղորդում է France24-ը։

Ժան-Նոել Բարոն հայտարարել է, որ Ալժիրի քայլը «ցավալի է» և «չի մնա առանց հետևանքների»։ Նա հավելել է, որ եթե «Ալժիրն ընտրի էսկալացումն, ապա մենք կպատասխանենք մեծագույն կոշտությամբ»։

Ալժիրի արտգործնախարարությունը ֆրանսիացի 12 դիվանագետի «պերսոնա նոն գրատա» էր հայտարարել Ֆրանսիայում Ալժիրի հյուպատոսարանի պաշտոնյայի ձերբակալությունից հետո: Ալժիրը դա որակել էր որպես «ստոր արարք» և դրանում մեղադրել Ֆրանսիայի ներքին գործերի նախարարին։ 

Ապրիլի 11-ին Ֆրանսիայի դատախազները մեղադրանք էին առաջադրել երեք ալժիրցու, այդ թվում՝ հյուպատոսարանի մեկ աշխատակցի՝ 2024 թվականին Փարիզի արվարձաններից մեկում Ալժիրի կառավարության ընդդիմախոսներից մեկի առևանգմանը մասնակցության կասկածանքով։ Երեք կասկածյալները կալանքի տակ են պահվում։