1 րոպեի ընթերցում
ԱՄՆ-ի ֆինանսների նախարարության արտասահմանյան արժեթղթերի վերահսկողության վարչությունը (OFAC) իրանական միջուկային ծրագրին առնչվող ֆիզիկական մեկ ու իրավաբանական հինգ անձանց է ընդգրկել պատժամիջոցների ցուցակներում: «Արմենպրես»-ի հաղորդմամբ՝ այս մասին նշված է գերատեսչության կայքում։
«OFAC- ը պատժամիջոցների ցուցակներում ընդգրկել է Իրանում գտնվող հինգ ընկերությունների և մեկ անհատի՝ իրանական միջուկային ծրագիրը կառավարող և վերահսկող առանցքային կազմակերպություններին, այդ թվում՝ Իրանի միջուկային էներգիայի կազմակերպությանը և նրան ենթարկվող տեխնոլոգիական ընկերությանն աջակցելու համար»,- նշված է նախարարության տարածած հաղորդագրությունում։
Պատժամիջոցների ներքո են հայտնվել նշված կազմակերպությունների համար տեխնոլոգիաներ ձեռք բերող կամ արտադրող ընկերությունները։
ԱՄՆ-ի նախագահ Դոնալդ Թրամփն ավելի վաղ Իրանի Գերագույն առաջնորդ այաթոլլա Ալի Համենեին ուղղված նամակում առաջարկել էր երկու ամսվա ընթացքում նոր համաձայնագիր կնքել միջուկային ծրագրի վերաբերյալ։