2 րոպեի ընթերցում
ԱՄՆ-ն Կատարի միջնորդների միջոցով նոր առաջարկ է փոխանցել ՀԱՄԱՍ-ին՝ փորձելով ազատել ամերիկացի պատանդ Էդան Ալեքսանդերին և վերսկսել Գազայում հրադադարի շուրջ բանակցությունները: «Արմենպրես»-ի փոխանցմամբ՝ այս մասին հաղորդում է Axios լրատվական հարթակը՝ վկայակոչելով իսրայելցի և ամերիկացի պաշտոնյաների:
Ինչպես հայտարարել են աղբյուրները, առաջարկով նախատեսվում է, որ ԱՄՆ նախագահ Դոնալդ Թրամփը հանդես գա հայտարարությամբ՝ կոչ անելով հանգստություն պահպանել Գազայում և վերսկսել բանակցությունները մշտական հրադադարի շուրջ՝ Ալեքսանդերին ազատ արձակելու դիմաց:
Հայտնի չէ՝ արդյոք ՀԱՄԱՍ-ը կընդունի այս առաջարկը։
«Դեռ համաձայնություն չկա»,- ասել է ամերիկացի պաշտոնյան։
Իսրայելցի պաշտոնյան հայտարարել է, որ նոր առաջարկն «ավելի շուտ գաղափար է, որը լիովին հստակ կամ մշակված չէ»:
Մինչդեռ արաբ դիվանագետը, խոսելով The Times of Israel հրատարակության հետ, կասկած է հայտնել, թե ՀԱՄԱՍ-ը կհամաձայնի Ալեքսանդերին ազատ արձակել միայն Թրամփի հայտարարության դիմաց։ Նրա կարծիքով՝ պաղեստինյան շարժումը կպահանջի ավելի էական ինչ-որ բան։
Արաբ դիվանագետի խոսքով՝ Կատարի և Եգիպտոսի միջնորդները Դոհայում ՀԱՄԱՍ-ի պատվիրակության հետ հանդիպել են մարտի 27-ի երեկոյան՝ քննարկելու ԱՄՆ-ի վերջին առաջարկը:
Թե Իսրայելն ինչպես կարձագանքի դրան, նույնպես պարզ չէ:
Մարտի 27-ին Իսրայելի վարչապետ Բենիամին Նեթանյահուն խորհրդակցություններ է անցկացրել իր անվտանգության ծառայությունների պետերի և գլխավոր խորհրդականների հետ՝ քննարկելու այդ հարցը։
Axios-ը հաղորդում է, որ Եգիպտոսը մի քանի օր առաջ ՀԱՄԱՍ-ի ներկայացուցիչների հետ հանդիպում է անցկացրել Կահիրեում՝ մեկ այլ առաջարկ քննարկելու համար՝ փորձելով շարունակել բանակցությունները:
Նշվում է, որ Գազայի սահմաններից դուրս գործող ՀԱՄԱՍ-ի առաջնորդները պատրաստ են եղել համաձայնել Եգիպտոսի առաջարկին, սակայն Գազայում շարժման ռազմական առաջնորդ Մոհամմեդ Սինվարը մերժել է այն:
