Չեխական ավանդույթների լուսանկարների ցուցահանդեսը Գյումրիում ընդունել է ավելի քան 700 այցելու
2 րոպեի ընթերցում
Գյումրու ժողովրդական ճարտարապետության և քաղաքային կենցաղի թանգարանում ավարտվել է Հայաստանում Չեխիայի դեսպանության կողմից կազմակերպված չեխական ավանդույթների լուսանկարների երկամսյա ցուցահանդեսը։ Ցուցահանդեսն ընդունել է ավելի քան 700 այցելու։
«Արմենպրես»-ի հաղորդմամբ՝ ցուցադրությունը ներառել է չեխ հայտնի լուսանկարիչ Ալժբետա Յունգրովայի «Չեխական ավանդույթները» խորագրով աշխատանքները։ Ցուցահանդեսը ներկայացրել է չեխական ավանդույթները, տոները և ծեսերը, ինչպես նաև հնարավորություն ընձեռել գյումրեցիներին և Գյումրի այցելած հյուրերին ավելի մոտիկից ծանոթանալ չեխական մշակույթին։
Թանգարանի տնօրեն Անի Նազարյանը «Արմենպրես»-ին տված հարցազրույցում նշեց, որ սա թանգարանի առաջին համագործակցությունն էր Հայաստանում Չեխիայի դեսպանության հետ, և արտահայտեց վստահություն, որ այն կշարունակվի։ «Սա թանգարանի առաջին համագործակցությունն էր Հայաստանում Չեխիայի դեսպանության հետ, և վստահ եմ, որ այն կշարունակվի։ Առաջիկայում մենք նախատեսում ենք նոր համագործակցություններ, ցուցադրություններ և միջոցառումներ՝ հայ-չեխական հարաբերությունները ավելի խորացնելու համար»,– նշել է Անի Նազարյանը։
Թանգարանի տնօրենը կարևորել է նաև միջթանգարանային և արտաթանգարանային համագործակցությունը՝ բուհերի, դեսպանատների և այլ կառույցների հետ, ինչը կդարձնի թանգարանային գործունեությունը ավելի ակտիվ և բազմազան։