2 րոպեի ընթերցում
Ավելի քան 30 000 մարդ ստիպված է եղել լքել իրենց տները Կոլումբիայի հյուսիսում զինված խմբավորումների միջև բախումների պատճառով։ Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտնել է Օմբուդսմենի գրասենյակը։
«Այսօրվա դրությամբ հաղորդվում է առնվազն 32 000 տեղահանված անձանց մասին: Նրանց մեծ մասը ժամանել է Կուկուտա (15 086), Օկանյա (11 503) և Տիբա (5 300)»,- ասված է հաղորդագրության մեջ:
Օմբուդսմենի գրասենյակը չի նշել տվյալներ զոհվածների մասին՝ հայտնելով, որ դիերի փոխանցումը դատաբժշկական փորձագետներին շարունակվում է։ Արդեն ճանաչված է 33 մարդու աճյուն։ Հունվարի 18-ին Նորտե դե Սանտանդերի դեպարտամենտի նահանգապետ Վիլյամ Վիլյամիսարը հայտնել է 80 զոհի մասին։
Հունվարի 17-ին Կոլումբիայի նախագահ Գուստավո Պետրոն հայտարարել է Ազգային ազատագրության բանակի (ԱԱԲ) ապստամբների հետ հաշտության բանակցությունների դադարեցման մասին՝ նրանց բախումների պատճառով այլ զինված խմբավորումների հետ, որոնք կազմավորվել են «Կոլումբիայի հեղափոխական զինված ուժերի (ԿՀԶՈՒ) նախկին անդամների կողմից Կատատումբոյի տարածաշրջանում։ Պետության ղեկավարն ապստամբների գործողություններն անվանել է ռազմական հանցագործություններ։
Այս իրադարձությունների ֆոնին Պետրոն երկրում արտակարգ դրություն է հայտարարել։
ԱԱԲ-ն, որի կազմում կա մի քանի հազար մարդ, երկրում մնացել է միակ խոշոր ապստամբական խմբավորումն այն բանից հետո, երբ 2016 թվականին կառավարությունը հաշտության համաձայնագիր է կնքել ԿՀԶՈՒ-ի հետ: Այս փաստաթուղթը վերջ է դրել արյունալի հակամարտությանը, որը տևել է ավելի քան կես դար և խլել ավելի քան 250 000 մարդու կյանք։ 2022 թվականի նոյեմբերին իշխանությունները հայտարարել են ԱԱԲ-ի հետ երկխոսություն սկսելու մասին։ Երկխոսության գործընթացը մի քանի անգամ դադարեցվել է և վերսկսվել: