2 րոպեի ընթերցում
ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ։ Դատարաններում ներկայում գտնվում են ապօրինի գույքը պետությանը վերադարձնելու պահանջով մոտ 120 գործեր, որոնցով ակնկալվում է ՀՀ-ին վերադարձնել շատ ավելի մեծ քանակությամբ գույք և դրամական միջոցներ։
«Արմենպրես»-ի հաղորդմամբ՝ այս մասին լրագրողների հետ ճեպազրույցում ասաց ՀՀ արդարադատության նախարար Սրբուհի Գալյանը։
Նրա խոսքով՝ համապատասխան օրենքով ներդրված նոր գործիքը շատ կարճ ժամանակահատվածում կարողացել է ապահովել ձեռքբերված ապօրինի գույքի վերադարձը պետությանը, որի արժեքը կազմում է 5 միլիարդ դրամ։
Բացի այդ, նախարարի տեղեկատվությամբ, կան 2 միլիարդ դրամն անցնող դրամական միջոցների և գույքի պահանջով դատական ակտեր, որոնք դեռ ուժի մեջ չեն մտել և գտնվում են բողոքարկման փուլում։
Չնայած արդեն իսկ առկա արդյունքին՝ նախարարի գնահատմամբ՝ առնվազն 7-10 տարի կպահանջվի նշված գործիքի կայացման ու դրա արդյունավետությունը գնահատելու համար։
«Մենք կարողացել ենք շատ ավելի արագ տեմպով ապահովել արդյունք, և կարծում եմ, որ 5 միլիարդ դրամի վերադարձի մասին խոսելը քիչ չէ՝ հաշվի առնելով նաև այն հանգամանքը, որ այսօր դատարաններում գտնվում են բազմաթիվ գործեր, որոնց թիվը, եթե չեմ սխալվում, մոտ 120 է: Այդ գործերով ակնկալվում է ՀՀ-ին վերադարձնել շատ ավելի մեծ քանակությամբ գույք, դրամական միջոցներ և մասնակցություններ իրավաբանական անձանցում»,-մանրամասնեց գերատեսչության ղեկավարը՝ կարևորելով այդ դատական գործերի ընթացքի նկատմամբ հանրային վերահսկողությունը։
