Սիրիայի տարածքային ամբողջականության պահպանումը Իրանի տարածաշրջանային ռազմավարությունն է. Փեզեշքիանը՝ Ասադին

ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ։ Սիրիայի նախագահ Բաշար ալ Ասադը և Իրանի նրա պաշտոնակից Մասուդ Փեզեշքիանը հեռախոսազրույցի ընթացքում քննարկել են Սիրիայում վերջին զարգացումները և Դամասկոսի ու Թեհրանի միջև երկկողմ հարաբերությունները։ «Արմենպրես»-ի փոխանցմամբ՝ այս մասին հաղորդում է Mehr լրատվական գործակալությունը։ 

Սիրիական կողմի նախաձեռնությամբ կայացած հեռախոսազրույցի ընթացքում Իրանի նախագահը հայտարարել է, որ Սիրիայի ինքնիշխանությունը և տարածքային ամբողջականությունը պահպանելը Իրանի տարածաշրջանային ռազմավարությունն է։ Փեզեշքիանն ընդգծել է Իրանի շարունակական աջակցությունը Սիրիայի կառավարությանը և ժողովրդին։

«Մենք հավատացած ենք, որ Սիրիան ևս մեկ անգամ կհաղթահարի սիոնիստական ռեժիմի դավերը երկրի անվտանգության և կայունության դեմ, և այս ճանապարհին կանգնած ենք Սիրիայի կառավարության և ժողովրդի կողքին», - Փեզեշքիանի խոսքերն է մեջբերել Իրանի նախագահի մամուլի ծառայությունը։

Ըստ Սիրիայի նախագահի մամուլի ծառայության՝ երկու երկրները տեսակետներ են փոխանակել Սիրիայում անվտանգության վերջին զարգացումների շուրջ, ինչպես նաև քննարկել են երկկողմ համագործակցությունն ահաբեկչության դեմ պայքարի հարցում։ 

Երկու նախագահներն էլ Սիրիայում տեղի ունեցող զարգացումների մեջ մեղադրել են այդ թվում Միացյալ Նահանգներին։ 

Նոյեմբերի 27-ին «Հայաթ Թահրիր աշ-Շամ»-ին (նախկինում՝ Ջաբհաթ ան Նուսրա) պատկանող խմբավորումները խախտել են ապաէսկալացման համաձայնագիրը և հարձակվել Հալեպ և Իդլիբ նահանգների վրա։ Նրանք գրոհել են բնակավայրերն ու զինվորականների դիրքերը, իսկ նոյեմբերի 29-ին լայնածավալ գործողություն են սկսել՝ շարժվելով դեպի Հալեպ և Համա։ Նոյեմբերի 30-ին գրոհայինների վերահսկողության տակ է անցել Հալեպը և նրա շրջակայքը, այդ թվում՝ միջազգային օդանավակայանը և Քուվեյրիս ռազմական օդանավակայանը։