1 րոպեի ընթերցում
ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ։ Միլիարդատեր Իլոն Մասկը Նյու Յորքում հանդիպել է ՄԱԿ-ում Իրանի մշտական ներկայացուցիչ Ամիր Սայիդ Իրավանիի հետ՝ քննարկելու ԱՄՆ-ի և Իրանի միջև լարվածությունը նվազեցնելու ուղիները։ «Արմենպրես»-ի փոխանցմամբ՝ այս մասին գրում է The New York Times-ը՝ վկայակոչելով իրանցի երկու պաշտոնյայի, որոնց անունը չի նշվում:
Ըստ հրապարակման՝ Մասկը և Իրավանին հանդիպել են նոյեմբերի 11-ին Նյու Յորքում, և նրանց «զրույցը կենտրոնացել է Իրանի և ԱՄՆ-ի միջև լարվածությունը նվազեցնելու վրա»:
Պարբերականի աղբյուրների փոխանցմամբ՝ միլիարդատիրոջ և Իրանի մշտական ներկայացուցչի հանդիպումը գաղտնի վայրում տևել է ավելի քան մեկ ժամ. այն նախաձեռնել է Մասկը, իսկ վայրն ընտրել է Իրավանին։
The New York Times-ի զրուցակիցները հանդիպումը որակել են որպես «դրական» ու «լավ նորություն»։
Ավելի վաղ ԱՄՆ նորընտիր նախագահ Դոնալդ Թրամփը հայտարարել էր, որ Մասկը նախագահի նախկին թեկնածու և ձեռնարկատեր Վիվեկ Ռամասվամիի հետ միասին կգլխավորի Կառավարության արդյունավետության վարչությունը: