Քաջարանի թունելի շինարարության համար Հայաստանը կստանա 200 մլն դոլարի վարկ. նախագիծը հաստատվեց
1 րոպեի ընթերցում
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ։ Հայաստանը և Եվրասիական զարգացման բանկը համաձայնագիր են կնքել Կայունացման և զարգացման հիմնադրամի միջոցներից Քաջարանի թունելի շինարարության եւ M2 ճանապարհի 4 կմ հատվածի վերակառուցման համար 200 մլն ԱՄՆ դոլարի վարկ տրամադրելու մասին:
«Արմենպրես»-ի հաղորդմամբ՝ Ազգային ժողովի ֆինանսավարկային եւ բյուջետային հարցերի մշտական հանձնաժողովի նիստում ՀՀ տարածքային կառավարման եւ ենթակառուցվածքների նախարարի տեղակալ Քրիստինե Ղալեչյանը նշեց, որ ծրագիրը համաֆինանսավորվելու է Հայաստանի կողմից՝ շուրջ 194 մլն 259 ԱՄՆ դոլարի չափով։
Նրա խոսքով՝ այս ներդրումային համաձայնագիրը ստորագրվել է 2024 թվականի հուլիսի 26-ին։ Նախատեսվում է, որ ծրագրի իրականացման արդյունքում գործող երթուղին կկրճատվի 14 կիլոմետրով, տրանսպորտային միջոցների միջին արագությունը կհասնի 80 կմ/ժամ, Քաջարան-Ագարակ ճանապարհի երթուղին կկրճատվի շուրջ 40 րոպեով։
Վարկի պայմաններով՝ տոկոսադրույքը ֆիքսված է տարեկան 4 տոկոս, մարման ժամկետը մինչեւ 20 տարի է, որից մինչեւ 5 տարին արտոնյալ ժամանակահատված է։
Ազգային ժողովի ֆինանսավարկային եւ բյուջետային հարցերի մշտական հանձնաժողովը նախագծին տվել է դրական եզրակացություն։