Լևոն Տեր-Պետրոսյանը Օլիվիե Դըկոտինյիի հետ հանդիպմանն անդրադարձել է Հայաստանի ներքին և արտաքին քաղաքական խնդիրներին
1 րոպեի ընթերցում
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ առաջին Նախագահ Լևոն Տեր-Պետրոսյանը հոկտեմբերի 24-ին իր առանձնատանը հանդիպել է Հայաստանում Ֆրանսիայի արտակարգ և լիազոր դեսպան Օլիվիե Դըկոտինյիի հետ։
Ինչպես «Արմենպրես»-ին տեղեկացրին «Հայ ազգային կոնգրես»-ից, դեսպանի խնդրանքով Լևոն Տեր-Պետրոսյանը անդրադարձել է Հայաստանի ներքին և արտաքին քաղաքական խնդիրներին։ Միաժամանակ, նա շնորհակալություն է հայտնել մեր երկրի ներկայիս ծանր իրավիճակում Ֆրանսիայի կառավարության դրսևորած անկեղծ և սկզբունքային աջակցության համար։
«Անդրադառնալով Հայաստանի հանդեպ Ֆրանսիայի կառավարության և ժողովրդի տածած ջերմ բարեկամական զգացմունքներին՝ Լևոն Տեր-Պետրոսյանը հատկապես մատնանշել է Շառլ Ազնավուրի հուղարկավորության և Միսաք ու Մելինե Մանուշյանների աճյունները Պանթեոնում ամփոփելու հոգեցունց և խորհրդանշական պետական արարողությունները»,- ասվում է հաղորդագրության մեջ։