Պաղեստինը Գազայի հյուսիսում տեղի ունեցող իրադարձությունների ֆոնին կոչ է արել դադարեցնել կրակը

ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Պաղեստինի արտաքին գործերի նախարարությունը դիմել է միջազգային հանրությանը` պահանջելով անհապաղ հրադադար հաստատել Գազայի հատվածում՝ հյուսիսային շրջաններին Իսրայելի վերջին զանգվածային հարվածների ֆոնին:

«Արմենպրես»-ի հաղորդմամբ՝ այս մասին գերատեսչությունը հայտարարություն է տարածել X-ի միկրոբլոգում:

Պաղեստինի ԱԳՆ-ն նաև կոչ է արել կատարել ՄԱԿ-ի Գլխավոր ասամբլեայի կողմից սեպտեմբերի 18-ին ընդունված բանաձևը, որը պահանջում է Իսրայելից մեկ տարվա ընթացքում լքել պաղեստինյան օկուպացված տարածքները։

Հոկտեմբերի 20-ի գիշերը Իսրայելի ռազմաօդային ուժերը ռմբակոծել են Գազայի հյուսիսում գտնվող Բեյթ Լահիյա քաղաքը։ 

Պաղեստինի առողջապահական գերատեսչության հաղորդմամբ՝ դրա հետևանքով ավելի քան ութ տասնյակ մարդ  է զոհվել, իսկ 40-ը՝ վիրավորվել: