Զելենսկին Կիևի հարձակման ենթարկվելուց հետո քննադատել է ռուսական նավթամթերքի արտահանման սահմանափակումների թուլացումը

Ուկրաինայի նախագահ Վոլոդիմիր Զելենսկին հոկտեմբերի 10-ին Կիևի վրա հարձակումից հետո հայտարարել է, որ Ռուսաստանին նավթամթերք վաճառելու թույլտվությունը կարող է ավելացնել պատերազմը շարունակելու համար նրա ֆինանսական հնարավորությունները։ «Արմենպրես»-ի փոխանցմամբ՝ Զելենսկին այս մասին գրել է իր պաշտոնական Տելեգրամի ալիքում։ Նրա խոսքով՝ էներգետիկ օբյեկտների դեմ ռեակտիվ «Շահեդ» անօդաչուների կիրառմանը հաջորդել է բալիստիկ հրթիռներով հարձակում։

«Հրթիռների մի մասը հաջողվել է խոցել։ Սա ևս մեկ անգամ հստակ ցույց է տալիս, թե որոնք են Ռուսաստանի իրական մտադրությունները»,– նշել է Ուկրաինայի նախագահը։

Զելենսկու գնահատմամբ՝ արտահանումից ստացվող լրացուցիչ եկամուտները Ռուսաստանը կուղղի սպառազինության արտադրության համար անհրաժեշտ բաղադրիչների ու սարքավորումների ձեռքբերմանը, անօդաչուների կատարելագործմանը և հրթիռների արտադրությանը։

Նա ԱՄՆ-ին, Եվրոպային ու մյուս գործընկերներին կոչ է արել ուժեղ ազդակներ ուղարկել՝ ի աջակցություն Ուկրաինայի և Ռուսաստանի՝ պատերազմ վարելու կարողությունը սահմանափակելուն։

ԱՄՆ նախագահ Դոնալդ Թրամփը և ՌԴ նախագահ Վլադիմիր Պուտինը հեռախոսազրույց են ունեցել հոկտեմբերի 9-ին։ ԱՄՆ նախագահը զրույցից հետո Truth Social սոցիալական ցանցի իր էջում գրել է, որ Ռուսաստանի նախագահ Վլադիմիր Պուտինի հետ քննարկման արդյունքում պայմանավորվել են ռուսական դիզելային վառելիք մատակարարել ամերիկյան և համաշխարհային շուկաներ։

Ավելի ուշ Կրեմլի տելեգրամյան ալիքում հրապարակված տեսանյութում զրույցի մանրամասներին անդրադարձել է նաև ՌԴ նախագահի օգնական Յուրի Ուշակովը։ Նա նշել է, որ երկու երկրների առաջնորդները նաև քննարկել են տնտեսական խոշոր նախաձեռնությունների նախապատրաստումը, այդ թվում՝ ամերիկյան և համաշխարհային շուկաներ ռուսական նավթամթերքի հնարավոր մատակարարումները։