ԵՄ-ն ողջունել է «Խաղաղության խաչմերուկ» նախագիծը և աշխատում է այն կյանքի կոչելու ուղղությամբ. Վասիլիս Մարագոս
2 րոպեի ընթերցում
ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ: Եվրամիությունը ողջունել է Հայաստանի կառավարության ներկայացրած «Խաղաղության խաչմերուկ» նախագիծը և Հայաստանում ու տարածաշրջանում իր գործընկերների հետ ակտիվորեն աշխատում է այն կյանքի կոչելու ուղղությամբ:
«Արմենպրես»-ի հաղորդմամբ՝ Երևանում կայացած «Խաղաղության խաչմերուկ. միավորելով անվտանգությունն ու ժողովրդավարությունը» խորագրով համաժողովում այս մասին հայտարարեց Հայաստանում ԵՄ պատվիրակության ղեկավար, արտակարգ և լիազոր դեսպան Վասիլիս Մարագոսը:
Նա նշեց, որ տպավորված է համաժողովի նախապատրաստման աշխատանքներով, շնորհավորեց «Կոնրադ Ադենաուեր» հիմնադրամի և իրենց մյուս գործընկերներին՝ այս նախաձեռնությունն ու գործընթացը որակելով «շատ կարևոր»:
«Անմիջապես կուզենայի ընդգծել, որ գործընկերության խորհրդի նիստում, որին նաև ներկա է գտնվել նախարար Միրզոյանը (խմբ- ՀՀ ԱԳ նախարար Արարատ Միրզոյանը), ողջունվել է այս նախաձեռնությունը, որի նպատակն է խաղաղություն և նորմալ հարաբերություններ հաստատել տարածաշրջանում, նաև բացել տրանսպորտային ուղիները՝ պահպանելով ազգային իրավազորության սկզբունքները և ապահովելով նաև փոխադարձությունը, որը դրված է հենց «Խաղաղության խաչմերուկ»-ի հիմքում: Նախորդ տարվա հոկտեմբերին ներկա եմ գտնվել, երբ վարչապետը ներկայացրեց այս նախաձեռնությունը: Մենք ողջունեցինք այն և Հայաստանում ու տարածաշրջանում մեր բոլոր գործընկերների հետ ակտիվորեն աշխատում ենք, որպեսզի նախաձեռնությունը կյանքի կոչվի»,- նշեց Վասիլիս Մարագոսը: