2 րոպեի ընթերցում
ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի կենդանաբանական այգում մեկնարկել են փղերի համար նոր կացարանի նախագծման աշխատանքները: Շինարարության մեկնարկը նախատեսվում է 2025 թվականին, որից հետո այգին կսկսի գործընկերների հետ բանակցություններ՝ նոր փիղ ձեռք բերելու նպատակով:
«Արմենպրես»-ի հաղորդմամբ՝ այս մասին Երևանի քաղաքապետարանի գործակարգավարական նիստի ժամանակ հայտնեց քաղաքապետարանի աշխատակազմի բնապահպանության վարչության պետի ժամանակավոր պաշտոնակատար Սիրարփի Հայկազյանը՝ նշելով, որ կենդանաբանական այգու ընդլայնման և բարեկարգման աշխատանքները բնականոն հունով ընթանում են:
«Այս պահի դրությամբ ավարտվել են զեբրերի և կռունկների ազատավանդակների կառուցման, ամուրյան վագրի ազատավանդակի բարեկարգման և լողավազանի կառուցման աշխատանքները: Նշեմ, որ բոլոր նոր ազատավանդակներն, ի տարբերություն նախկինում եղածների, կառուցվում են յուրաքանչյուր կենդանու համար իրեն մոտ բնական միջավայրի շրջանակում: Մի շարք նոր ազատավանդակների կառուցումն այժմ ընթացքի մեջ է, աշխատանքները կավարտվեն նոյեմբեր ամսին»,-ասաց Սիրարփի Հայկազյանը:
Կենդանաբանական այգում գործարկվել են նոր ճեմուղիներ և հուշանվերների խանութ:
Սիրարփի Հայկազյանը տեղեկացրեց, որ ներդրվել է տոմսերի առցանց համակարգ: Այժմ քաղաքացիները տոմսեր կարող են ձեռք բերել Երևանի կենդանաբանական այգու կայքէջից: