Մի աստղ միանում է երկնակամարին. ՀՀ-ում Ֆրանսիայի դեսպանն անդրադարձել է Ալեն Դելոնի մահվան լուրին և Ծիծեռնակաբերդ այցին
2 րոպեի ընթերցում
![Մի աստղ միանում է երկնակամարին. ՀՀ-ում Ֆրանսիայի դեսպանն անդրադարձել է Ալեն Դելոնի մահվան լուրին և Ծիծեռնակաբերդ այցին](http://armenpress.am/resized/480/storage/images/articles/2024/08/18/M7upeNuM1LEhspH2XUT0ebipEd7BQ4M1bLwFDNOJ.webp)
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Հայաստանում Ֆրանսիայի արտակարգ և լիազոր դեսպան Օլիվյե Դըկոտինյին արձագանքել է ֆրանսիացի լեգենդար կինոաստղ Ալեն Դելոնի մահվան լուրին՝ հիշեցնելով, որ նա Հայաստան կատարած այցելության ընթացքում եղել է նաև Հայոց ցեղասպանության զոհերի հուշահամալիրում:
«Արմենպրես»-ի հաղորդմամբ այս մասին Հայաստանում Ֆրանսիայի դեսպանը գրառում է կատարել X-ի միկրոբլոգում:
«Ալեն Դելոնի մահը. մի աստղ միանում է երկնակամարին: Այստեղ 2012 թվականին Երևանում, որտեղ նա այցելել է Հայոց ցեղասպանության հուշահամալիր»,-ասված է Դըկոտինյիի գրառման մեջ, որին կից նա հրապարակել է Ալեն Դելոնի լուսանկարը Ծիծեռնակաբերդում:
Ալեն Դելոնի անհետացումը. Մի աստղ միանում է երկնակամարին:
— Olivier Decottignies (@O_Decottignies) August 18, 2024
Այստեղ 2012 թվականին Երեւանում, որտեղ նա այցելել է Հայոց ցեղասպանության հուշահամալիր։ pic.twitter.com/vitKqjZOfJ
Ալեն Դելոնը Հայաստան է ժամանել 2012-ի դեկտեմբերի 17-ին՝ «Շնորհավոր Ամանոր, մայրեր» լիրիկական կոմեդիայի պրեմիերայի առթիվ:
Այս տարվա օգոստոսի 18-ին հայտնի է դարձել, որ ութսունութ տարեկան հասակում մահացել է ֆրանսիական կինոյի լեգենդ Ալեն Դելոնը։
«Ալեն Ֆաբիենը, Անուշկան, Էնթոնին, ինչպես նաև (նրա շունը) Լուբոն խոր վշտով հայտնում են իրենց հոր մահվան մասին։ Նա մահացել է խաղաղությամբ Դուշիում գտնվող իր տանը՝ շրջապատված իր երեք երեխաների և իր ընտանիքի կողմից»,- ասված է նրա ընտանիքի տարածած հայտարարությունում:
Ալեն Ֆաբիեն Մորիս Մարսել Դելոնը ծնվել է 1935 թվականի նոյեմբերի 8-ին։ Որպես դերասան՝ հայտնիների շարքում հայտնվել է շատ արագ. արդեն 23 տարեկանում նրան համեմատում էին ֆրանսիացի այնպիսի դերասանների հետ, ինչպիսիք են Ժերար Ֆիլիպը և Ժան Մարեն, ինչպես նաև ամերիկացի դերասան Ջեյմս Դինը։ Դերասանը ֆրանսիական կինոյի ոսկե դարաշրջանի աստղ էր, որը հայտնի էր էկրանին իր կոշտ կերպարով:
Ընդհանուր առմամբ, նա իր կարիերայի ընթացքում նկարահանվել է ավելի քան 90 ֆիլմում։