Կյանքից հեռացել է կինոյի լեգենդ Ալեն Դելոնը
2 րոպեի ընթերցում
![Կյանքից հեռացել է կինոյի լեգենդ Ալեն Դելոնը](http://armenpress.am/resized/480/storage/images/articles/2024/08/18/0GBAaqyQdqOP8dw6qBRYJs2AC454faGMQ5bTNNb8.webp)
ԵՐԵՎԱՆ, 11 ՕԳՈՍՏՈՍԻ, ԱՐՄԵՆՊՐԵՍ: Ութսունութ տարեկան հասակում մահացել է ֆրանսիական կինոյի լեգենդ Ալեն Դելոնը։ «Արմենպրես»-ի փոխանցմամբ՝ այս մասին հաղորդում է BBC-ն:
«Ալեն Ֆաբիենը, Անուշկան, Էնթոնին, ինչպես նաև (նրա շունը) Լուբոն խոր վշտով հայտնում են իրենց հոր մահվան մասին։ Նա մահացել է խաղաղությամբ Դուշիում գտնվող իր տանը՝ շրջապատված իր երեք երեխաների և իր ընտանիքի կողմից»,- ինչպես մեջբերել է աղբյուրը, ասվում է նրա ընտանիքի տարածած հայտարարությունում:
Ալեն Ֆաբիեն Մորիս Մարսել Դելոնը ծնվել է 1935 թվականի նոյեմբերի 8-ին։ Որպես դերասան՝ հայտնիների շարքում հայտնվել է շատ արագ. արդեն 23 տարեկանում նրան համեմատում էին ֆրանսիացի այնպիսի դերասանների հետ, ինչպիսիք են Ժերար Ֆիլիպը և Ժան Մարեն, ինչպես նաև ամերիկացի դերասան Ջեյմս Դինը։ Դերասանը ֆրանսիական կինոյի ոսկե դարաշրջանի աստղ էր, որը հայտնի էր էկրանին իր կոշտ կերպարով:
1990-ականներից նրա ֆիլմերում հայտնվելը հազվադեպ էր, բայց նա մնաց հայտնիների շարքում:
Ընդհանուր առմամբ, նա իր կարիերայի ընթացքում նկարահանվել է ավելի քան 90 ֆիլմում։
Դելոնի վերջին խոշոր հանրային ելույթը 2019 թվականի մայիսին Կաննի կինոփառատոնում Պատվավոր Արմավենու ճյուղ ստանալու ժամանակ է տեղի ունեցել, իսկ ավելի վաղ հայտարարել էր դերասանական կարիերան ավարտելու մասին: