2 րոպեի ընթերցում
ԵՐԵՎԱՆ, 9 ՕԳՈՍՏՈՍԻ, ԱՐՄԵՆՊՐԵՍ։ Ռուսաստանի իշխանությունները հայտնել են, որ գիշերը մի քանի մարզեր ենթարկվել են ուկրաինական անօդաչու թռչող սարքերի զանգվածային հարձակման։
«Արմենպրես»-ի փոխանցմամբ՝ Լիպեցկի նահանգապետ Իգոր Արտամոնովը հայտնել է, որ մարզում ԱԹՍ-ների զանգվածային հարձակման հետևանքով կա 9 վիրավոր։
Լիպեցկի շրջանում սահմանվել է արտակարգ դրության ռեժիմ՝ պայթյունների հետևանքները վերացնելու համար։
Նահանգապետը հայտնել է, որ վնասվել է էներգետիկ ենթակառուցվածքի օբյեկտ, արձանագրվել են էլեկտրամատակարարման խափանումներ։
Ռուսաստանի արտակարգ իրավիճակների նախարարությունն իր հերթին հայտնել է Լիպեցկի մարզի ռազմական օդանավակայանում բռնկված հրդեհի մասին։ Օդանավակայանը գտնվում է այն բնակավայրերի մերձակայքում, որոնցից ավելի վաղ կատարվել է բնակչության տարհանում։ Ըստ նահանգապետ Արտամոնովի՝ բնակիչների անվտանգությունն ապահովելու համար տարհանում է իրականացվել Կոպցևի Խուտորա, Ֆեդորովկա, Յակովլևկա, Տինկովկա բնակավայրերից։
Մարզի մի քանի բնակավայրերի բնակիչներին տարհանել են, Լիպեցկ քաղաքում և Լիպեցկի շրջանում դադարեցվել է ուղևորատար տրանսպորտի երթևեկությունը։ Մարզում չեղարկվել են բոլոր զանգվածային միջոցառումները։
Ըստ ՌԴ պաշտպանության նախարարության՝ Լիպեցկի մարզի երկնքում գիշերը խոցվել է 19 ինքնաթիռային տիպի ԱԹՍ, իսկ, ընդհանուր առմամբ, Ռուսաստանի տարածքում՝ 75 ԱԹՍ։
Զանգվածային հարվածների է ենթարկվել նաև Բելգորոդի մարզը, որի երկնքում խոցվել է 29 ԱԹՍ։ Վնասվել են բնակելի տներ, մեքենաներ, բազմաբնակարան շենքի մի քանի բնակարաններում հրդեհ է բռնկվել։
Կուրսկի մարզը, որտեղ օգոստոսի 6-ից մարտեր էին ընթանում սահմանից ներթափանցած ուկրաինական ուժերի դեմ, նույնպես ենթարկվել է հրթիռների և ԱԹՍ-ների հարձակման։ Ըստ Կուրսկի նահանգապետի պաշտոնակատար Ալեքսեյ Սմիրնովի՝ գիշերը մարզի երկնքում խոցվել է 4 հրթիռ, 4 ինքնաթիռային տիպի ԱԹՍ։
Բացի այդ, ԱԹՍ-ներ են խոցվել նաև Բրյանսկի, Վորոնեժի և Օռլովի մարզերում, Սև ծովի երկնքում և Ղրիմում։