Հույս ունենք, որ Հայաստանի եւ Ադրբեջանի միջեւ եղած տարաձայնությունները շուտով կհարթվեն․ Զախարովա
2 րոպեի ընթերցում
ՄՈՍԿՎԱ, 24 ՀՈՒԼԻՍԻ, ԱՐՄԵՆՊՐԵՍ։ Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Հայաստանի եւ Ադրբեջանի միջև խաղաղության պայմանագրի կնքումը պաշտոնական Մոսկվան դիտարկում է որպես անփոխարինելի գործոն տարածաշրջանում ամրություն եւ սոցիալ-տնտեսական զարգացում ապահովելու համար։
Մոսկվայում «Արմենպրես»-ի թղթակցի փոխանցմամբ՝ ամենշաբաթյա մամուլի ասուլիսի ժամանակ Զախարովան այս համատեքստում նշել է նաեւ, որ Ռուսաստանում հույս ունեն, որ կողմերի միջև եղած տարաձայնությունները շուտով կհարթվեն, եւ գործընթացը կընթանա եռակողմ պայմանավորվածության տիրույթում՝ բարձր մակարդակով։
«Հարավային Կովկասի ճակատագիրն ու ապագան պետք է որոշեն բացառապես տարածաշրջանի երկրները եւ գործընկերները։ Այլ գործոններ մեր ընդհանուր տուն խաղաղություն չեն բերի»,- նշել է ռուս պաշտոնյան։
Զախարովան հիշեցրել է նաեւ, որ Մոսկվան մեկ անգամ չէ, որ ընդունել է խաղաղության պայմանագրի կնքման նպատակով ընթացող հայ-ադրբեջանական բանակցությունները եւ պատրաստ է հետագայում եւս շարունակել այդ գործընթացը՝ երաշխավորելով ստեղծել առավելագույն արդյունավետ պայմաններ երկու պատվիրակությունների աշխատանքի համար։
Միաժամանակ, ՌԴ ԱԳՆ պաշտոնական ներկայացուցիչը ողջունել է նաեւ այդ ուղղությամբ Ղազախստանի գործադրած ջանքերը, մասնավորապես՝ ընթացիկ տարվա մայիսի 10-11-ին Ալմա-Աթայում կայացած Հայաստանի եւ Ադրբեջանի արտաքին քաղաքական գերատեսչությունների ղեկավարների հանդիպումը՝ այն որակելով արդյունավետ։