Թբիլիսիի քաղաքային խորհրդի պատվիրակությունն այցելել է Ծիծեռնակաբերդի հուշահամալիր, հյուրերին ընդունել է Երևանի փոխքաղաքապետը

1 րոպեի ընթերցում

ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: Երևանի քաղաքապետի առաջին տեղակալ Արմեն Փամբուխչյանը և քաղաքապետի տեղակալ Լևոն Հովհաննիսյանն ընդունել են Թբիլիսիի քաղաքային խորհրդի նախագահ Գիորգի Տկեմալաձեի գլխավորած պատվիրակությանը: Հանդիպմանը մասնակցել է նաև ՀՀ-ում Վրաստանի արտակարգ և լիազոր դեսպան Գիորգի Շարվաշիձեն:

Ինչպես «Արմենպրես»-ին տեղեկացրին Երևանի քաղաքապետարանից, Վրաստանի պատվիրակությունն այցելել է Ծիծեռնակաբերդի հուշահամալիր: Պատվիրակության անդամները ծաղկեպսակ և ծաղիկներ են դրել Հայոց ցեղասպանության զոհերի հիշատակը հավերժացնող անմար կրակի մոտ:

Ըստ աղբյուրի՝ ողջունելով հյուրերին՝ Երևանի քաղաքապետի առաջին տեղակալը կարևորել է հայ-վրացական բարեկամական կապերն ու գործընկերային հարաբերությունները և վստահեցրել, որ պատվիրակության այցը կխթանի երկու մայրաքաղաքների օրենսդիր մարմինների միջև կապերի ընդլայնմանն ու փորձի փոխանակմանը։

Նշվում է, որ կողմերն ընդգծել են, որ այցի շրջանակում հանդիպումներն ու քննարկումները կլինեն արդյունավետ, գործակցության նոր հնարավորություններ կընձեռեն, ինչպես նաև կամրապնդվի ավագանիների համագործակցությունը:

Բաժանորդագրվեք մեր ալիքին Telegram-ում