ԵՄ-ն մշտական ներկայացուցիչների մակարդակով համաձայնեցրել է ՌԴ-ի դեմ պատժամիջոցների 14-րդ փաթեթը
1 րոպեի ընթերցում
![ԵՄ-ն մշտական ներկայացուցիչների մակարդակով համաձայնեցրել է ՌԴ-ի դեմ պատժամիջոցների 14-րդ փաթեթը](http://armenpress.am/resized/480/storage/images/articles/2024/06/20/iV0KcSUJona2ssmAcpA3dk9QUsuloGXTN424YrE1.webp)
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: ԵՄ մշտական ներկայացուցիչները համաձայնեցրել են հակառուսական պատժամիջոցների հերթական փաթեթը: «Արմենպրես»-ի փոխանցմամբ՝ այս մասին հաղորդել է Եվրամիությունում Բելգիայի նախագահությունը:
«ԵՄ մշտական ներկայացուցիչները հենց նոր համաձայնեցրին պատժամիջոցների զորեղ և նշանակալի 14-րդ փաթեթը», - ասվում է X սոցիալական ցանցում զետեղված նախագահության հաղորդագրության մեջ:
Նշվում է, որ այն նախատեսում է ինչպես նոր միջոցներ, այնպես էլ ուժեղացնում է ավելի վաղ սահմանված պատժամիջոցների գործողությունը՝ փակելով հնարավոր սողանցքները։
Ավելի վաղ ԶԼՄ-ները հաղորդում էին, որ հակառուսական պատժամիջոցների 14-րդ փաթեթը կներառի նավթատար նավերի և հեղուկացված գազի մատակարարման սահմանափակումներ։
EUobserver հարթակի հաղորդմամբ՝ պատժամիջոցների նոր փաթեթի մեջ կներառվի 20 ֆիզիկական և 22 իրավաբանական անձ։ Նաև փաստաթղթի նախագծում կընդգրկվեն հելիումի արտահանման և կրկնակի նշանակության առանձին տեխնոլոգիաների հասանելիության սահմանափակումներ։