Փամփուշտների գնումն իրականացվել է հրապարակային մրցակցային եղանակով. Վարչապետի աշխատակազմի պարզաբանումը

ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Գնդակների (փամփուշտների) գնումն իրականացվել է հրապարակային մրցակցային եղանակով, ինչը ենթադրում է գործընթացի  փաստաթղթային  ապահովման լիարժեք թափանցիկություն: «Արմենպրես»-ի փոխանցմամբ՝ այս մասին հայտարարություն է տարածել Հայաստանի Հանրապետության վարչապետի աշխատակազմը՝ հերքելով «Ժողովուրդ» օրաթերթի 2024թ. հունիսի 13-ի՝ «Վարչապետի աշխատակազմը փամփուշտ է գնում որսորդական խանութից» հոդվածում տեղ գտած տեղեկատվությունը:

«ՀՀ կառավարության 2005թ. դեկտեմբերի 9-ի N 2242-Ն որոշմամբ սահմանվել են բնապահպանության և ընդերքի տեսչական մարմնի պետական տեսուչին հատկացվող զենքի տեսակը, ձևը, մոդելը և քանակը, ինչպես նաև զենք կրելու իրավունք ունեցող պաշտոնների անվանացանկը` համաձայն հավելվածի: 

Ըստ այդմ, հիմք ընդունելով վերոնշյալը՝ տեսչական մարմնի կարիքների համար վարչապետի աշխատակազմի կողմից կազմակերպվել է  գնդակների (փամփուշտների) ձեռքբերման ՎԱԲՏ-ԳՀԱՊՁԲ-24/30 ծածկագրով ընթացակարգ: Ուշագրավ է, որ գնումն իրականացվել է հրապարակային մրցակցային եղանակով, ինչը ենթադրում է գործընթացի  փաստաթղթային  ապահովման լիարժեք թափանցիկություն: 

Մինչդեռ, հարկ ենք համարում տեղեկացնել, որ գնումների մասին ՀՀ օրենսդրության համաձայն՝ ռազմական տեխնիկայի, սպառազինության, ռազմամթերքի և ռազմատեխնիկական միջոցների ապահովման համար անհրաժեշտ ապրանքները, աշխատանքները և ծառայությունները ենթակա են ձեռք բերման ընթացակարգերի շրջանակներում»,- նշված է վարչապետի աշխատակազմի տարածած պարզաբանման մեջ: