«Շառլ Ազնավուր-100» միջոցառումների շարքը Գյումրիում ազդարարվեց հայտնի երգիծանկարիչ Ռընե Հովիվի՝ Ազնավուրին նվիրված ցուցադրությամբ

ԳՅՈՒՄՐԻ, 1 ԱՊՐԻԼԻ, ԱՐՄԵՆՊՐԵՍ: Հայաստանի ազգային հերոս, Ֆրանսիայի Պատվո լեգիոնի շքանշանակիր, աշխարհահռչակ շանսոնյե, հասարակական գործիչ Շառլ Ազնավուրի ծննդյան 100-ամյակին նվիրված միջոցառումների շարքը Գյումրիում ազդարարվեց ապրիլի 1-ին ֆրանսահայ հայտնի երգիծանկարիչ Ռընե Հովիվի (Խորեն Հովիվյան)՝ Ազնավուրին նվիրված ցուցադրությամբ։ Ինչպես տեղեկացնում է «Արմենպրես»-ը, ցուցադրությունը բացվեց Գյումրու Մարիամ եւ Երանուհի Ասլամազյան քույրերի պատկերասրահում։

Ռընե Հովիվը ձեւավորել է Ազնավուրի համերգների ցուցապաստառները, նրա աշխատանքների մեջ տեղ են գտել Ազնավուրի ծաղրանկարները:

«Ռընե Հովիվը Գյումրիում առաջին անգամ է և դրանով իսկ ստանում է իր մկրտությունը մեր հայրենի քաղաքում։ Երկու տարի առաջ այս շարքը ներկայացվել է Երևանում։ Ազնավուրի ծննդյան 100 ամյակը ՅՈՒՆԵՍԿՕ-ի հովանավորության ներքո նշվում է ամբողջ աշխարհում։ Ընդունեք այս ցուցադրությունը որպես երկու երկրների բարեկամության խորհրդանիշ, որպես «Շառլ Ազնավուր-100» միջոցառումների պաշտոնական բացում»,-ողջունելով ցուցադրության մասնակիցներին՝ նշեց Գյումրու քաղաքապետարանի մշակույթի, երիտասարդության հարցերի բաժնի պետ Լիլիթ Թովմասյանը։

Ցուցադրությանը ներկայացված են նաեւ 4 անիմացիոն պատկերներ, գծանկարների հեղինակը Ռընե Հովիվն է, իսկ տեսահոլովակների հեղինակները՝ Ասլամազյան քույրերի թանգարանի տնօրեն Կարեն Բարսեղյանն ու լուսանկարիչ Գուրգեն Գինոսյանը։

Միջոցառումը պաշտոնապես ներառված է «Ֆրանկոֆոնիայի օրեր 2024» միջոցառումների շարքում:

Խորեն Հովիվյանը ծնվել է 1929-ինՖրանսիայիՎիենքաղաքում։ Հայրը՝ Վահան Հովիվյանը, ծնվել էԱրևմտյան ՀայաստանիՍեբաստիաքաղաքում, եղել էՀայոց ցեղասպանությունիցհետո Հովիվյանների մեծ ընտանիքի միակ վերապրողը։ Նրա մանկությունն անցել է Բեյրութի ամերիկյան որբանոցում, որտեղից էլ տեղափոխվել է Ֆրանսիա։ 1947 թվականին Վահան Հովիվյանը ընտանիքով ներգաղթել էԽորհրդային Հայաստան, երկու տարի անց կեղծ ամբաստանությամբ ընտանիքն աքսորվել էԱլթայի երկրամաս՝ ցմահ բնակության։Ստալինիմահից հետո՝ 1957 թվականին է ընտանիքը վերադարձել էՀայաստան, որտեղից էլ յոթ տարի անց՝Ֆրանսիա։