Հարավային Աֆրիկայի իշխող կուսակցությունը կաջակցի Իսրայելի դեսպանատան փակման առաջարկին

ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ։ Հարավաֆրիկյան Հանրապետության իշխող կուսակցությունը՝ «Աֆրիկյան ազգային կոնգրեսը», հայտարարել է, որ կաջակցի երկրում Իսրայելի դեսպանատունը փակելու խորհրդարանի խնդրանքին։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։

Ընդդիմադիր «Տնտեսական ազատության մարտիկներ» կուսակցությունը հայտարարել է, որ իր առաջնորդ Ջուլիուս Մալեման խնդրանքը կներկայացնի խորհրդարանում:

«Աֆրիկյան ազգային կոնգրեսը կհամաձայնի խորհրդարանի խնդրանքին՝ կոչ անելով կառավարությանը փակել Իսրայելի դեսպանատունը Հարավային Աֆրիկայում և դադարեցնել բոլոր դիվանագիտական ​​հարաբերությունները Իսրայելի հետ այնքան ժամանակ, մինչև Իսրայելը համաձայնի հրադադարին և մասնակցի ՄԱԿ-ի աջակցությամբ անցկացվող բանակցություններին, որոնց արդյունքը պետք է լինի արդար, կայուն և տևական խաղաղությունը»,- ասված է «Աֆրիկյան ազգային կոնգրես»-ի հայտարարության մեջ։