2 րոպեի ընթերցում
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Իսլամական հեղափոխության պահապանների կորպուսը (ԻՀՊԿ) հրետանի և զրահապատ մեքենաներ է տեղափոխում Իրաքի հետ սահման։ Նման քայլի պատճառն այն է, որ մոտենում է սեպտեմբերի 19-ի վերջնաժամկետը, երբ Իրաքյան Քրդստանի տարածաշրջանային կառավարությունը պետք է զինաթափի քրդական խմբավորումներին, որոնք Թեհրանն ահաբեկչական է համարում։ «Արմենպրես»-ի փոխանցմամբ՝ այս մասին հաղորդում է իրանական Tasnim գործակալությունը։
Լրատվամիջոցը լուսանկարներ է տարածել, որոնք ցույց են տալիս հրետանու և տանկերի տեղափոխումը Իրանի հյուսիս-արևմտյան շրջաններ։
Հուլիսին Իրանի բարձրաստիճան ռազմական հրամանատարներից մեկն Իրաքի կառավարությանը նախազգուշացրել էր, որ եթե Իրաքի կառավարությունը մինչև սեպտեմբերի վերջնաժամկետը գործողություններ չձեռնարկի «թշնամական զինված խմբերի դեմ», ապա դա կարող է հանգեցնել նրանց դեմ Իրանի զինված ուժերի նոր հարվածների։
ԻՀՊԿ-ն 2022 թ․-ին մի շարք հարվածներ էր հասցրել Իրաքյան Քրդստանում այդ խմբերի դիրքերին։
Սեպտեմբերի 13-ին Իրաքի ԱԳՆ ղեկավարը ժամանել էր Թեհրան, որտեղ իրանցի իր գործընկերոջ հետ բանակցություններում քննարկել էր հարցեր՝ կապված քրդական խմբավորումների զինաթափման հետ, ինչպես նաև այդ համաձայնագրի կատարման ժամկետները։