368.54
Մինսկը և Թեհրանը ռազմական համագործակցության պլան են ստորագրել
2 րոպեի ընթերցում
ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: Բելառուսը և Իրանն ստորագրել են պաշտպանության գերատեսչությունների միջև փոխըմբռնման հուշագիր և 2023 թվականի ռազմական համագործակցության պլան։
«Արմենպրես»-ի փոխանցմամբ՝ այդ մասին հայտնել է Բելառուսի Պաշտպանության նախարարության մամուլի ծառայությունը՝ ամփոփելով Թեհրանում Բելառուսի պաշտպանության նախարար գեներալ-լեյտենանտ Վիկտոր Խրենինի և Իրանի պաշտպանության և զինված ուժերի աջակցության նախարար բրիգադային գեներալ Մոհամմադ Ռեզա Աշտիանիի հանդիպման արդյունքները։
«Հանդիպման արդյունքներով կողմերն ստորագրել են փոխըմբռնման հուշագիր Բելառուսի Հանրապետության Պաշտպանության նախարարության և Իրանի Իսլամական Հանրապետության Պաշտպանության և զինված ուժերի աջակցության նախարարության միջև ռազմական համագործակցության վերաբերյալ, ինչպես նաև ընթացիկ տարվա Երկկողմ ռազմական համագործակցության պլան», - ասված է մամուլի ծառայության հաղորդագրության մեջ։
Ըստ մամուլի ծառայության տեղեկատվության` հանդիպման ընթացքում պաշտպանության գերատեսչությունների ղեկավարները մտքեր են փոխանակել «միջազգային օրակարգի հրատապ հարցերի շուրջ, ինչպես նաև քննարկել են ռազմական ոլորտում փոխգործակցության զարգացման վիճակն ու հեռանկարները»։
Բելառուսի պաշտպանության նախարարության ղեկավարն Իրանում է գտնվում պաշտոնական այցով:
Բաժանորդագրվեք մեր ալիքին Telegram-ում