1 րոպեի ընթերցում
ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ: Երևանի «Ուրարտու» ֆուտբոլային ակումբի գլխավոր մարզիչ Դմիտրի Գունկոն Չեմպիոնների լիգայի որակավորման առաջին փուլի մրցակցին ուժեղ թիմ է համարում:
«Հստակ գիտակցում ենք մրցակցի ուժեղ կողմերը և նրանց թույլ կողմերն էլ լավ գիտենք, քանի որ ուսումնասիրել ենք նրանց: Մարզումների ընթացքում փորձել ենք լուծումներ տալ այն հնարավոր իրավիճակներին, որոնք կունենանք խաղի ընթացքում»,- «Արմենպրես»-ի հաղորդմամբ` լրագրողների հետ հանդիպման ժամանակ ասաց Գունկոն:
Մարզչի խոսքով` երևանյան ակումբի առաջնային խնդիրը մրցակցի ուժեղ կողմերը չեզոքացնելն է, և առավելագույն դրական արդյունքի հասնել սեփական ուժեղ կողմերի շնորհիվ:
«Ֆուտբոլիստների ֆիզիկական վիճակը նույնքան կարևոր է, որքան նրանց հոգեբանական վիճակը: Վստահ եմ, որ առաջիկա խաղում մեր թիմը անմարդկային ջանքեր կգործադրի հաղթելու համար»,- հավաստեց նա:
Ֆուտբոլի Չեմպիոնների լիգայի որակավորման առաջին փուլի շրջանակներում «Ուրարտու»-ն կընդունի «Զրինսկի»-ին: Հանդիպումը կկայանա «Ուրարտու»-ի մարզադաշտում և կմեկնարկի Երևանի ժամանակով 19:00-ին: