2 րոպեի ընթերցում
ԵՐԵՎԱՆ, 24 ՄԱՐՏԻ, ԱՐՄԵՆՊՐԵՍ: Ֆրանսիայի ներքին գործերի նախարար Ժերալդ Դարմանինը հայտարարել է, որ Ֆրանսիան պատրաստ է Մեծ Բրիտանիայի թագավոր Չարլզ III-ի այցին։ Այս մասին «Արմենպրես»-ը տեղեկանում Է ТАСС գործակալությունից:
«Կներգրավվեն 4 հազար ոստիկաններ և ժանդարմներ: Մենք խիստ կենտրոնացած ենք, ես արդեն մի քանի շաբաթ է, ինչ զբաղվում եմ Մեծ Բրիտանիայի թագավորի այցի նախապատրաստմամբ նախագահի և վարչապետի անունից: Մենք, ակնհայտ Է, պատրաստ կլինենք ընդունելու նրան և ստեղծելու լավագույն պայմանները», - ասել է նախարարը CNews հեռուստաալիքի եթերում։ Նա հավելել է, որ Չարլզ III-ի այցի ընթացքում ահաբեկչությունների սպառնալիքներ չկան։
Դարմանինը խուսափել է պատասխանել հանրապետությունում բրիտանական միապետի գտնվելու ծրագրում հնարավոր փոփոխությունների մասին հարցին՝ ևս մեկ անգամ կրկնելով, որ «ՆԳՆ-ն պատրաստ է այցին»։
Ավելի վաղ BFM հեռուստաալիքը հայտնել էր, որ Ֆրանսիա Չարլզ III-ի առաջին պետական այցի ծրագիրը փոփոխվելու է կենսաթոշակային տարիքի բարձրացման դեմ գործադուլների պատճառով։ Մասնավորապես, ցույցերի պատճառով կարող է հետաձգվել թագավորի և Ֆրանսիայի նախագահ Էմանուել Մակրոնի ընթրիքը, որն սկզբանապես պետք է տեղի ունենար Վերսալում երկուշաբթի՝ մարտի 27-ի երեկոյան: