Դնեպրում 9-հարկանի շենքի գնդակոծության զոհերի թիվը հասել է 40-ի, Դոնեցկում ևս ուկրաինական հարվածներից կան զոհեր
3 րոպեի ընթերցում
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Ուկրաինայի Դնեպր քաղաքում հունվարի 14-ին տեղի ունեցած գնդակոծությունից հետո ավերվել է ավելի քան 200 բնակարան: Գտնվել է 40 մարդու մարմին: 77 մարդ վիրավորվել է, այդ թվում՝ 14 երեխա: Բնակիչներին տարհանել են գրեթե ամբողջ շենքից, նրանց համար պատրաստել են ժամանակավոր կացարաններ: «Արմենպրես»-ի փոխանցմամբ՝ այս մասին հայտնել է Ուկրաինայի նախագահի գրասենյակի ղեկավարի տեղակալ Կիրիլ Տիմոշենկոն:
Նա նշել է, որ որոնողափրկարարական աշխատանքները կշարունակվեն այնքան ժամանակ, մինչև չգտնվեն բոլոր զոհերի մարմինները:
Ավելի վաղ Ուկրաինայի իշխանությունները հայտնել էին, որ հունվարի 14-ին ռուսական հերթական զանգվածային գնդակոծության ժամանակ հրթիռներից մեկն ընկել էր Դնեպրում 9-հարկանի շենքի վրա՝ ամբողջությամբ փլուզելով շենքի հատվածներից մեկը:
Իսկ Դոնեցկի Ժողովրդական Հանրապետության Արտակարգ իրավիճակների նախարարությունից հաղորդել են, որ Ուկրաինայի զինված ուժերի գնդակոծության հետևանքով շենք է փլուզվել. փլատակների տակից գիշերը դուրս է բերվել 2 կնոջ մարմին: Ավելի վաղ հաղորդվել էր, որ փլատակների տակից դուրս է բերվել 1 տղամարդու մարմին:
Որոնողափրկարարական աշխատանքները դեռ շարունակվում են:
Ուկրաինայում ռազմական գործողությունները շարունակվում են արդեն 328 օր:
Ամփոփելով նախորդ օրվա հիմնական իրադարձությունները՝ BBC-ի ռուսական ծառայությունը նշում է, որ Մեծ Բրիտանիան հայտարարել է Ուկրաինային տասնչորս Challenger-2 տանկեր, ինքնագնաց հաուբիցներ, ինչպես նաև հարյուրավոր այլ զրահամեքենաներ, զինամթերք և հարյուրավոր հրթիռներ ուղարկելու մասին: Այսպիսով, Բրիտանիան դառնում է առաջին երկիրը, ով Կիևին կմատակարարի արևմտյան նմուշի տանկեր:
Արձագանքելով Ուկրաինա տանկեր ուղարկելու Բրիտանիայի որոշմանը՝ ՌԴ նախագահի մամուլի քարտուղար Դմիտրի Պեսկովը հայտնել է, որ Մոսկվան բացասական է որակում այդ քայլը: Նա նշել է, որ Բրիտանիան, Լեհաստանը և այն երկրները, որոնք նոր սպառազինություն են ուղարկում Ուկրաինային, չեն կարող տեղում փոխել իրավիճակը:
«Այդ տանկերն այրվում են և կայրվեն, ինչպես մյուսները», - ասել է Պեսկովը՝ նշելով, որ «հատուկ ռազմական գործողությունը» կշարունակվի և կհասնի իր նպատակին: