Թուրքիայի նախագահի խոսնակը հայտնել է, որ Վլադիմիր Պուտինի Թուրքիա կայանալիք այցի ամսաթիվը կհայտարարվի մոտ օրերս
1 րոպեի ընթերցում
ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Թուրքիայի նախագահ Ռեջեփ Թայիփ Էրդողանի խոսնակ Իբրահիմ Քալընը հայտնել է, որ Ռուսաստանի Դաշնության նախագահ Վլադիմիր Պուտինի՝ Թուրքիա այցի ամսաթիվը կհայտարարվի մոտ օրերս:
Այս մասին, ինչպես հաղորդում է «Արմենպրես»-ը, Քալընը ասել է թուրքական A haber հեռուստաընկերության եթերում:
«Մեր նախագահի առաջարկը Ռուսաստանի և Ուկրաինայի նախագահների հանդիպման վերաբերյալ կարևոր նշանակություն ունի։ Ուկրաինան դրան դրական է նայում, եթե Ռուսաստանը նույնպես դրական պատասխան տա, ապա հանդիպումը կկայանա։ Պարոն Պուտինը կայցելի Թուրքիա, ժամկետը հայտնի կդառնա մոտ օրերս»,- ասել է Քալընը։
Ըստ Քալընի, Թուրքիան «միակ երկիրն է», որը կարող է դեր խաղալ ստեղծված ճգնաժամի կարգավորման հարցում։
Նա նաև նշել է, որ Պուտինն ու Էրդողանը լավ և վստահելի հարաբերություններ են զարգացրել վերջին յոթ-ութ տարիների ընթացքում։