2 րոպեի ընթերցում
ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ: Հայաստանի մարմնամարզության հավաքականի անդամ Արթուր Դավթյանը կարող է Օլիմպիական խաղերի եզրափակիչում ցանկացած մեդալ նվաճել:
«Արմենպրես»-ի հետ զրույցում այս մասին ասաց Հայաստանի հավաքականի գլխավոր մարզիչ Հակոբ Սերոբյանը: «Արթուրի բոլոր մրցակիցները եզրափակիչում ուժեղ են, ինչը երևում է նրանց գրանցած արդյունքներից որակավորման փուլում: Սա մարմնամարզություն է, որտեղ սպորտային բախտը ևս պետք է լինի: Դավթյանը կարող է ցանկացած մեդալ նվաճել: Նրան պետք է միայն կրկնել վարժությունը նույնությամբ: Ժամանակը հասունացել է, և Արթուրը ինքն էլ շատ լավ գիտակցում է դա»,- ասաց Սերոբյանը:
Մասնագետի խոսքով` համավարակի պայմաններում անցկացվող Օլիմպիական խաղերը շատ են տարբերվում և մեծ բարդությամբ են առաջ գնում: «Այս վիճակն ազդում է բոլորի, ոչ միայն մարզիկների վրա: Տպավորությունն այնպիսին է, որ կիսակալանավորված վիճակում ենք»,- ասաց նա:
Հայաստանի մարմնամարզության հավաքականի անդամ Արթուր Դավթյանն Օլիմպիական խաղերիհենացատկերի վարժության եզրափակիչում է: Տոկիոյում ընթացող Խաղերի առանձին վարժությունների հենացատկերում Դավթյանն ընդհանուր պայքարում հավաքեց 14,866 միավոր և երկրորդ տեղով դուրս եկավ եզրափակիչ: Առաջին տեղով եզրափակիչ դուրս եկավ Կորեան ներկայացնող Ջիհվան Շին, որը նույնքան միավոր հավաքեց, որքան հայ մարմնամարզիկը:
Տղամարդկանց հենացատկերի եզրափակիչը կկայանա օգոստոսի 2-ին: