Հայկ Մարությանը «Երևան քաղաքի պատվավոր փրկարար»-ի կոչում է շնորհել ԱԻՆ փրկարար ծառայության տնօրենին
2 րոպեի ընթերցում
ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: Երևանի քաղաքապետ Հայկ Մարությանը ՀՀ արտակարգ իրավիճակների նախարարի պաշտոնակատար Անդրանիկ Փիլոյանի հետ ներկա է գտնվել 2020թ. արցախյան պատերազմի զոհերի հիշատակը հավերժացնող խաչքարի բացման արարողությանը: Խաչքարը տեղադրվել է Երևան քաղաքի փրկարարական վարչության շենքի բակում:
Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, այնուհետև քաղաքապետ Հայկ Մարությանը արտակարգ իրավիճակների կանխարգելման, հնարավոր հետևանքների վերացման և արագ արձագանքման, ինչպես նաև բնակչության անվտանգության ապահովմանն ուղղված ակտիվ գործունեության համար ՀՀ ԱԻՆ փրկարար ծառայության տնօրեն Արմեն Գասպարյանին շնորհել է «Երևան քաղաքի պատվավոր փրկարար»-ի կոչում:
«Անկախ օրից ու ժամից, ցանկացած իրավիճակներում հենց դուք եք համայնքի ու բնակչի կողքին, և մենք միասին կարողանում ենք հաղթահարել շատ դժվարություններ: Եվ, որ ամենակարևորն է, Երևանի բնակիչը այդ ծառայությունն իր մաշկի վրա զգում և գնահատում է»,- ընդգծել է քաղաքապետն ու մեկ անգամ ևս շնորհակալություն հայտնել ԱԻՆ աշխատակիցներին՝ պատասխանատու և նվիրված աշխատանքի համար:
Ըստ աղբյուրի՝ ԱԻՆ աշխատակիցներին պարգևներ է հանձնել նաև նախարարի պաշտոնակատար Անդրանիկ Փիլոյանը:
Երևանի քաղաքապետի տեղակալ Սերգեյ Հարությունյանն էլ պարգևատրվել է ՀՀ ԱԻՆ «Համագործակցություն հանուն փրկության» մեդալով: