2 րոպեի ընթերցում
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ։ Թուրքիան դատապարտել է Լիբիայի ազգային բանակի կողմից իր նավի առգրավումը և սպառնացել լուրջ հետևանքներով, եթե Լիբիայում թուրքական շահերը վտանգվեն։ Ինչպես հաղորդում է «Արմենպրես»-ը, այս մասին ասվում է դեկտեմբերի 8-ին Թուրքիայի արտգործնախարարության կողմից տարածված հայտարարության մեջ:
Ինչպես ավելի վաղ հայտարարել էր Լիբիական ազգային բանակի պաշտոնական ներկայացուցիչ Ահմեդ ալ-Միսմարին, Մարշալ Խալիֆա Հաֆթարի ղեկավարության տակ գտնվող Լիբիայի ազգային բանակի ռազմածովային ուժերը ձերբակալել էին Ճամայկայի դրոշի տակ նավարկող և Լիբիայի ջրային սահմանները խախտած թուրքական առևտրական նավը:
«Մենք տեղեկացել ենք, որ հեղափոխության առաջնորդ Հաֆթարին պատկանող, այսպես կոչված, Լիբիայի ազգային բանակը ձերբակալել է Ճամայկայի դրոշի տակ նավարկող թուրքական նավը։ Մենք խստորեն դատապարտում ենք այդ գործողությունը: Անհրաժեշտ է անհապաղ քայլեր ձեռնարկել, որպեսզի նավը շարունակի շարժվել ըստ նախնական պլանավորվածության: Մենք հիշեցնում ենք, որ թուրքական շահերի վտանգումը Լիբիայում ծանր հետևանքներ կունենան», - ասված է Թուրքիայի արտաքին գերատեսչության տարածած հայտարարության մեջ:
Լիբիայում շարունակվում է առճակատումը Ֆայեզ Սարաջի Ազգային համաձայնության կառավարության (ԱՀԿ) , որը վերահսկում է Տրիպոլին և երկրի արևմուտքում գտնվող տարածքները, և մարշալ Խալիֆա Հաֆթարի հրամանատարությամբ գործող Լիբիայի ազգային բանակի (ԼԱԲ) միջև, որը համագործակցում է արևելյան խորհրդարանների հետ: ԱՀԿ-ին աջակցում են Թուրքիան և Քաթարը, իսկ ԼԱԲ-ին `Եգիպտոսը և ԱՄԷ-ն: Ռուսաստանի արտգործնախարարությունը հայտարարել է, որ Լիբիայում գործադրվող ջանքերի նպատակը պետք է լինի երկրի ինքնիշխանության և պետականության վերականգնումը:
Սեդրակ Սարգսյան