Կարևոր է, որ հուսալի խաղ ցուցադրենք պաշտպանությունում. Կապառոս

ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ֆուտբոլի ազգային թիմի գլխավոր մարզիչ Խոակին Կապառոսի կարծիքով՝ Ազգերի լիգայի որակավորման երկրորդ փուլի Հայաստան-Էստոնիա խաղում թիմերը հավասարազոր ձգտումով են խաղալու:

«Թե Հայաստանը, թե Էստոնիան նմանատիպ տակտիկական սխեմա են օգտագործում: Խաղում են 4-4-2 խաղային դիրքով: Բնական է, որ երկու թիմերն էլ նվիրումով են խաղալու և փորձելու են գոլային պահեր ստեղծել: Կարևոր է, որ հուսալի խաղ ցուցադրենք պաշտպանությունում: Մենք պետք է կարողանանք խորը վերլուծել Հյուսիսային Մակեդոնիայից կրած պարտությունը»,- «Արմենպրես»-ի հաղորդմամբ` նախախաղային առցանց ասուլիսին ասաց նա:

Ըստ Կապառոսի՝ Հայաստանի ընտրանու կազմում նորեկները շատ են, սակայն դա հնարավորություն է տալիս իսպանացի մասնագետին ընտրություն կատարել:

Անդրադառնալով ազգային թիմի ավագ Հենրիխ Մխիթարյանի` հավաքականին չմիանալու փաստին, որը մեծ տարաձայնությունների պատճառ է դարձել, մարզիչը ասաց, որ խոսել է հայ կիսապաշտպանի հետ անձամբ և որևէ կոնֆլիկտային իրավիճակ չկա ֆուտբոլիստի մոտ:

Ֆուտբոլի Ազգերի լիգայի որակավորման երկրորդ փուլի շրջանակներում Հայաստանի ընտրանին սեպտեմբերի 8-ին Երևանում կհյուրընկալի Էստոնիայի հավաքականին: Հանդիպումը կմեկնարկի Երևանի ժամանակով 20:00-ին:

Պատրաստեց Վարվառա Հայրապետյանը