ԵՐԵՎԱՆ, 5 ԱՊՐԻԼԻ, ԱՐՄԵՆՊՐԵՍ: Մրցանակաբաշխությամբ  ամփոփվեցին Հայաստանում առաջին անգամ իրականացվող՝ «Կլիմայի փոփոխությունը և կանայք Հայաստանում» խորագրով նախագծի արդյունքները:

Լիանա Մարգարյան Ջոն Գալագեր Տաթևիկ Ստեփանյան Նաթիա Նացվլիշվիլի Աննա Մազմանյան

Լուսանկարները` Մխիթար Խաչատրյանի

 «Արմենպրես»-ի հաղորդմամբ՝ մրցանակաբաշխությանը ներկա էին ՀՀ շրջակա միջավայրի նախարարի տեղակալ, ՄԱԿ ԿՓՇԿ-ի ազգային համակարգող Աննա Մազմանյանը, ՄԱԶԾ մշտական ներկայացուցիչ Նաթիա Նացվլիշվիլին, ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը և ՀՀ-ում Մեծ Բրիտանիայի դեսպան Ջոն Գալագերը:

ՀՀ շրջակա միջավայրի նախարարի տեղակալ Աննա Մազմանյանը կարևորեց միջոցառումը՝ նշելով, որ Հայաստանում կանայք ակտիվորեն զբաղվում են կայուն ապագա ստեղծելով, և նրանց ներդրումը պետք է ճանաչվի, խրախուսվի և պատշաճ կերպով ներկայացվի հանրությանը:

«Ասեմ, որ շատ մեծ է այն լուման, որը ներդնում են  կանայք, այս աշխատանքի մեջ և ընդհանրապես բոլոր ոլորտներում: Իմ կարծիքով կանայք  պետք է լինեն այն շարժիչ ուժը, որը թույլ կտա մեր տղամարդկանց միշտ հաղթել, նրանց այժմ շատ անհրաժեշտ է մեր աջակցությունը, և ես կուզեմ, որ մենք լինենք այդ ուժը»,- ասաց նա:

ՄԱԶԾ մշտական ներկայացուցիչ Նաթիա Նացվլիշվիլին նշեց, որ միջոցառումը հրաշալի հարթակ կդառնա փորձի փոխանակման, ծանոթությունների հաստատման ու նոր գաղափարների ստեղծման համար:

«Հայաստանն աշխարհի 197 երկրների հետ միասին 1994 թվականին միացել է Կլիմայի Փոփոխության մասին ՄԱԿ-ի կոնվեցիային՝ պարտավորվելով նվազեցնել ջերմոցային գազերի արտանետումներն ու իրականացնել միջոցառումներ կլիմայի փոփոխության հետևանքներին հարմարվելու ուղղությամբ: Եվ այս գործում անշուշտ կանանց դերը շատ մեծ ազդեցություն ունի»,- ասաց Նաթիա Նացվլիշվիլին:

Մրցանակաբաշխությանը մասնակցած 100 հայտերից հաղթող  ճանաչվեցին 6 լավագույնները, որոնք պարգևատրվեցին հավաստագրերով և հատուկ մրցանակներով:

«Կլիմայի փոփոխության մեղմմանն ուղղված լուծումներ» անվանակարգում հաղթող  ճանաչվեց Աստղինե Պասոյանի ՝«ԵՄ հանուն Հայաստանի կայուն էներգետիկայի» նախագիծը:

«Կլիմայի փոփոխության հարմարվողականության միջոցառումներ»  անվանակարգում մրցանակի արժանացավ Նունե Սարուխանյանի «Ուսուցումներ» և « Ֆերմերային դաշտային դպրոցների ստեղծում» փոքր դրամաշնորհային նախագիծը:

«Կլիմայի խնդիրների լուսաբանում» անվանակարգում հաղթող ճանաչվեց Անահիտ Թարխանյանի՝ «Կանաչ էներգիան՝ կայուն եթերի ուղեկից» նախագիծը:

«Կլիմայական կրթությունը բոլորի համար» անվանակարգում մրցանակ հանձնեցին Հռիփսիմե Մկրտչյանին՝ «Աղբ չէ» ակցիաներ իրականացնելու  համար:

«Կլիմայական ֆինանսավորման և նորարարության լուծումներ» անվանակարգում հաղթող ճանաչվեց Նունե Հարությունյան և կանայք  թիմը՝ ԵՄ-ն հանուն շրջակա  միջավայրի տարածաշրջանային ծրագրի «Ռեսուրսների արդյունավետ օգտագործման և մաքուր արտադրության» նախագիծը:

«Երիտասարդները կլիմայական գործողություններում» անվանակարգում մրցանակ ստացավ Դիանա Բադեյանը՝ «Ապագա առաջնորդների ծրագիր» նախագծի համար: