Արմեն Գրիգորյանի կարծիքով՝ որոշ ուժեր չարաշահում են ազատ մամուլի տված հնարավորությունները
2 րոպեի ընթերցում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Անվտանգության խորհրդի քարտուղար Արմեն Գրիգորյանը Հայաստանի համար նոր իրավիճակ է արձանագրում, երբ պետք է ավելի շատ խոսել երկրի ժողովրդավարության զարգացման, կայացման ու պահպանության մասին։ Կառավարության նիստից հետո լրագրողների հետ զրույցում նա նշեց, որ արտախորհրդարանական որոշ ուժեր չարաշահում են ժողովրդավարության ընձեռած հնարավորությունները:
«Ես ոչ թե խնդիր եմ տեսնում, որ այդ ուժերը իշխանության կգան, ես խնդիր եմ տեսնում, որ իրենք, այսպես ասած, չարաշահում են ժողովրդավարության ընձեռած հնարավորությունները, ազատ մամուլի հնարավորությունները, հասարակությունում պառակտում են մտցնում և խնդիրներ ստեղծում։ Այս առումով մենք քննարկում ենք ծավալում, հասկանալու համար, թե ինչպես կարող ենք այդ խնդիրներին լուծում տալ։ Այս խնդրի լուծումը նման է ածելիի ծայրով քայլելուն, ու այդ սահմանը շատ նուրբ է։ Պետք է կարողանանք շատ նուրբ այդ սահմանը պահենք և այս սահմանով գնալով պահպանենք ժողովրդավարության սկզբունքներն ու անվտանգությունը երկրում»,-«Արմենպրես»-ի փոխանցմամբ՝ ասաց Գրիգորյանը։
Հարցին, թե որ ուժերի մասին է խոսքը, Արմեն Գրիգորյանն ասաց, որ այս պահին չի կարող նրանց մասին ավելի կոնկրետ խոսել, բայց բնականաբար, դրանք արտախորհրդարանական ուժերն են։ «Այդ ուժերը հիմնականում ֆեյք հաշիվների և ոչ հրապարակային հանդես եկողներն են, ովքեր կեղծ լուրեր են տարածում։ Դա անում են կեղծ հաշիվների միջոցով և այդ կեղծ հաշիվներում ավելի մեծ ազատություն ունենալով»,- ասաց ԱԽ քարտուղարը։
Հարցին՝ նկատի ունի ՀՀԿ-ին, թե ՀՅԴ-ին, Արմեն Գրիգորյանն ասաց, որ դժվար է իմանալ, թե այդ ֆեյքհաշիվների հետևում ովքեր են կանգնած, որովհետև տվյալների մասով սահմանափակումներ կան, հաճախ Ֆեյսբուքը տվյալներ չի տրամադրում, բայց այդ մասով որոշակի կասկածներ էլ են առաջանում։