Պահի պատմականությունն այն է, որ մենք ՀՀ-ում իշխանությունը լիարժեքորեն վերադարձնում ենք ժողովրդին. Նիկոլ Փաշինյանը՝ սպասվող քաղաքական գործընթացների մասին
3 րոպեի ընթերցում
ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի Հանրապետության վարչապետի պաշտոնակատար, վարչապետի թեկնածու Նիկոլ Փաշինյանը խորհրդարանում վարչապետի ընտրության հարցի քննարկման ընթացքում ունեցած ելույթում արձանագրեց, որ քննարկման արդյունքում վարչապետ չի ընտրվելու, և խորհրդարանն իրավունքի ուժով արձակվելու է: Ինչպես հաղորդում է «Արմենպրես»-ը, Նիկոլ Փաշինյանը իր ելույթում գնահատեց նաև պահի պատմականությունը: «Այսօրվա քննարկման արդյունքում Հայաստանի Հանրապետության վարչապետ չի ընտրվելու և Ազգային ժողովն արձակվելու է իրավունքի ուժով: Ես ուզում եմ գնահատել այս պահի պատմականությունը, որովհետև պատմականությունն այն չէ, որ Ազգային ժողովը լուծարվում է, և մենք առաջին անգամ ունենալու ենք արտահերթ խորհրդարանական ընտրություններ մեր երկրում: Պատմականությունն այն է, որ ապրիլ-մայիսին տեղի ունեցած ոչ բռնի, թավշյա, ժողովրդական հեղափոխությունից հետո մենք Հայաստանի Հանրապետության իշխանությունը լիարժեքորեն վերադարձնում ենք Հայաստանի քաղաքացիներին և հետագա քաղաքական գործընթացների ճակատագիրը որոշելու ամբողջ լիազորությունը վերադարձնում ենք Հայաստանի Հանրապետության քաղաքացիներին և ժողովրդին»,- ասաց ՀՀ վարչապետի պաշտոնակատարը:
Նա հավելեց՝ այսօր երեկոյան կամ վաղն առավոտյան ունենալու ենք մի իրավիճակ, երբ չունենք լիարժեք լիազորությունների մեջ գտնվող Ազգային ժողով, չունենք կառավարություն, որովհետև կառավարության անդամները պաշտոնակատարներ են: «Մենք ի վիճակի ենք լինելու ապահովել ընտրությունների 100 տոկոսով օրինականությունը, բոլորս վստահ կլինենք, որ ընտրությունների արդյունքները ձևավորվել են ժողովրդի կամարտահայտության արդյունքում, հետևաբար, այսօր մայիսին տեղի ունեցած հեղափոխությունը հասնում է լրումին: Եվ դե ֆակտո ժողովրդին վերադարձված իշխանությունը ժողովրդին է վերադարձվում դե յուրե, և ժողովուրդը հնարավորություն ունի դեկտեմբերին կայացրած դե յուրե և դե ֆակտո որոշմամբ որոշել իշխանության հետագա ճակատագիրը Հայաստանում»,- ասաց նա:
Եզրափակելով խոսքը՝ Փաշինյանը վստահություն հայտնեց, որ ժողովուրդը ամուր կպահի իր ձեռքում իշխանությունը ոչ միայն հիմա, այլ ընդմիշտ և այլևս երբեք այդ իշխանությունը բաց չի թողնի իր ձեռքից: